वीरगंज (पर्सा), २९ असार । नारायणगढ मुग्लिन सडकखण्डको सिमलतालमा असार २९ गते विहान करिब ३ बजेको समयमा पहिरोले त्रिशुलीमा बगाएको बससँगै पर्साको एउटै घरका ३ जना बेपत्ता भएपछि सखुवा प्रसौनी २ को जमुनिया गाउँ शोकमग्न छ । छोरीको पेटमा समस्या आएपछि रोपिसकेको ७ कठ्ठा खेत बन्धकी राखेर पर्साको सखुवा प्रसौनी २ जमुनियाका ५५ वर्षीय हृदयनारायण राउत, उनकी श्रीमती ५० वर्षीय भगवती देवी र बिरामी छोरी २२ वर्षीय चन्द्रभवा कुमारी बिहीबार साँझ काठमाडौँका लागि बस चढेका थिए ।
घरको आर्थिक अवस्था नाजुक थियो । छोरीको स्वास्थ्यमा पहिले देखिनै केही समस्या देखिएपनि आर्थिक जोह भएको थिएन । त्यसपछि हृदयनारायणले रोपिसकेको खेल साहुको बन्धकी राखे । साहुले दिएको ऋण बोकेर काठमाडौँ आउँदै गरेका राउत परिवार उपचारका लागि अस्पतालसम्म आउनै पाएनन् । असार २८ गते साँझ रङ्गपुरबाट आएका बसमा बाबुआमा र दिदीलाई जयलालले नै प्रसौनीबाट बसमा चढाएका थिए । बिहीबार साँझ ८ बजे विरगञ्जबाट काठमाडौँका लागि हिँडेको बागमती प्रदेश ०३ ००६ ख १५१६ नम्बरको बस काठमाडौँ सम्म आउनै पाएन । बिहान काठमाडौँ पुगेर फोन गर्छु भनेका बाबुले जयलाललाई आफ्नो खबर सुनाउनै पाएनन् । बरु एकाबिहानै जयलालले नै बाबुआमा र दिदी चढेको बस पहिरोसँगै त्रिशुलीमा बेपत्ता भएको खबर पाए ।
घरका तीनै जना बेपत्ता भएपछि अहिले राउतको परिवार सम्हालिन सकेका छैनन् । घरमा रुवाबासी छ । राउतको घरको आर्थिक अवस्था निकै कमजोर छ । रोजगारीका लागि साउदी अरेबिया पुगेको राउतका जेठा छोरा श्याम विनय राउत परिवार त्रिशुलीमा बेपत्ता भएको खबरले छटपटिएका छन् । परिवारका ३ सदस्य बेपत्ता भएका राउत परिवारले आफन्तजनको अवस्था छिट्टै पत्ता लगाइदिन सरकारसँग आग्रह गर्छन् । अहिले राउतको परिवारलाई सम्हाल्न गाउँलेहरूलाई गाह्रो भैरहेको छ । राउतको घरको आर्थिक अवस्था दयनीय छ । बेपत्ताहरूको छिट्टै खोजी गरि परिवारलाई आवश्यक राहतको व्यवस्थापन गरिदिन स्थानीहरू सरकारसँग आग्रह गर्छन् ।
चितवनको भरतपुर महानगरपालिका २९ सिमलतालमा पहिरो जाँदा विरगञ्जबाट काठमाडौँ आउँदै गरेको र काठमाडौँबाट गौर जाँदै गरेका दुइवटा बस पहिरोसँगै त्रिशुलीमा बगेका छन् । दुवै गाडीमा रहेका ६५ यात्रु मध्ये ३ जनाले हाम फालेर ज्यान जोगाएका छन् भने ६२ जनाको अवस्था अज्ञात छ । असार २९ गते शनिबार एकजनाको शव फेला परेको छ भने बाँकी यात्रु र बस अझै अज्ञात रहेको छ । साभार ः सिधाकुरा
प्रतिक्रिया दिनुहोस् !