• मुस्कान श्रेष्ठ
वीरगंज (पर्सा), २३ असार । वीरगञ्जमा गहवामाईको दोश्रो रथयात्रा आज भव्य रुपमा सम्पन्न भएको छ । ऐतिहासिक गहवामाई मन्दिरको १२ औँ वार्षिकउत्सवको अवसरमा वीरगञ्जमा दोश्रोपटक रथयात्रा निकालिएको हो ।
गहवामाई मन्दिरको प्राङ्गणबाट आज विहान साढे ६ बजे प्रारम्भ भएको रथयात्रा घण्टाघर, रेलवे रोड, अमर चौक, छपकैया चौक, बिर्ता चौक, अलख्यामठ, आदर्शनगर चौक, महाविरस्थान गर्दै पुनः गहवामाई मन्दिरमा समापन भएको थियो । रथ यात्रमा हिन्दु धर्म र संस्कृति झल्किने विभिन्न झाँकी सहित तराई–मधेशका प्रचलित लोकबाजा प्रस्तुत गरिएको थियो ।
रथयात्रामा सहभागी भक्तजनका लागि विभिन्न सामाजिक संघसंस्थाले नगरका ठाउँ ठाँउमा चिसो पानी, सर्वत, लस्सी र जुस निशुल्क वितरण गरेका थिए । रथयात्रामा बारा, पर्सा र छिमेकी मुलुक भारतबाट हजारौँको संख्यामा भक्तजनहरुको सहभागिता रहेको रथयात्रा समितिका अध्यक्ष श्याम पोखरेलले बताए । उनले साँझ भजन किर्तन तथा अन्य सांस्कृतिक कार्यक्रमको आयोजना हुने जानकारी दिए । यसैगरी असार २४ गते बेलुका ५ बजे प्रसाद ग्रहण कार्यक्रम रहेको आयोजकले जनाएको छ ।
काठको रथमा यसपटक विभिन्न दाताहहरुको सहयोगमा ३५ लाख मूल्यको करिब २८ केजी चाँदीबाट निर्मित डोलीमा गहवामाईको प्रतिमा राखिएको रथयात्रा समितिका अध्यक्ष पोखरेलले बताए । उनले चाँदीको प्रतिमा बाहेक यसपटकको रथयात्रामा करिब २० लाख रुपैयाँ खर्च हुने अनुमान रहेको बताए । गतवर्षको रथयात्रामा ६० लाख संकलन भएको मध्ये ४० लाख खर्च भएको र २० लाख बचत भएको अध्यक्ष पोखरेलको भनाई छ ।
यस्तै रथयात्रामा भक्तजनहरुको सहभागिता जनाउनका लागि वीरगञ्ज महानगरपालिकाले नगर क्षेत्रभित्रका शिक्षण संस्थाहरु एक दिनका लागि बन्द गराइएको छ भने २ दिनसम्म माछामासु तथा मदिरा विक्री वितरणमा रोक लगाइएको छ । वीरगञ्जलाई धार्मिक पर्यटन केन्द्र बनाउने उदेश्यले विभिन्न समयमा महाआरती, रथायात्रा लगायतका कार्यक्रमहरु हुुँदै आएको छ । सोही अनुरुप आज दोश्रोपटक रथयात्रा निकालिएको वीरगञ्ज महानगरपालिका कार्यालयले जनाएको छ ।
गतवर्ष २०८० असार ५ गते पहिलोपटक वीरगञ्जमा रथयात्रा निलिकाएको थियो । 
प्रतिक्रिया दिनुहोस् !