वीरगंज (पर्सा), २ असार । पर्साको कालिकामाई गाउँपालिका-२ गदियानी स्थित संचालनमा रहेको पशु उपशाखाको भवन प्रहरीले डोजर लगाएर भत्काएको छ । शनिबार एकाविहानै इलाका प्रहरी कार्यालय पोखरियाका प्रहरी निरीक्षक राजन ढकाल नेतृत्वको टोली भवन भत्काउने क्रममा स्थानीयले प्रतिकार गर्दा झडप भएको थियो । स्थानीय र प्रहरीबीच झडप हुँदा प्रहरीले त्यहाँ स्थित घरघरमा प्रवेश गरेर महिला, वृद्धवृद्धाहरुलाई अन्धाधुन्ध लाठी प्रहार गरेको स्थानीयहरुको आरोप छ । प्रहरीले डोजर लगाएर भवन भत्काउने क्रममा प्रतिकारमा उत्रिएका स्थानीयबासीहरुले रोक्न खोज्दा प्रहरीसँग झडप भएको थियो । झडपको क्रममा प्रहरीले स्थानीयबासीमाथि लाठी चार्ज पनि गर्दा २ जना सामान्य घाइते भएका छन् ।
स्थानीय सरकारसँग पनि समन्वय नगरी शनिबार बिहान अचानक डोजर लिएर आएको प्रहरीले गुण्डागर्दी शैलीमा भवन भत्काइदिएको क्लबका सचिव उमाशंकर साहको आरोप छ । उनका अनुसार भवन भत्काउन डोजरसहित आएको प्रहरीलाई गाउँका स्थानीय महिला, पुरुष, बृद्धबृद्धाले प्रतिवाद गर्न खोज्दा प्रहरीले अन्धाधुन्द लाठी प्रहार गर्नुको साथै घरघरमै पसेर प्रहरीले महिलालाई कुटपिट गरेको थियो । पुरुष प्रहरीले घरघरमै पसेर महिलाहरुलाई कुटपिट गरेको जानकारी पाउनासाथ कालिका टाइम्स दैनिक पत्रिकाका प्रबन्ध निर्देशक एवं रेडियो पोखरियाका अध्यक्ष छठु साह घटनास्थल पुगेर भिडियो बनाउन खोज्दा प्रहरी उनीमाथि नै जाइलागेको थियो । प्रहरीले गुण्डागर्दी शैलीमा सञ्चारकर्मी साहको मोबाइल खोसेर फोडेका थिए । त्यतिमात्रै नभई इन्सपेक्टर ढकालको निर्देशनमा प्रहरीले सञ्चारकर्मी साहलाई अमानवीय तरिकाबाट कुटपिट गरि इलाका प्रहरी कार्यालय कालिकामाई लगेका थिए । प्रहरीले घर खाली गराउने क्रममा गरेको गुण्डागर्दीको भिडियो सामाजिक सञ्जालमा भाइरल बनेको छ । इन्स्पेक्टर ढकालले वडाध्यक्ष एवं विपक्षी दलका नेताहरुको प्रभावमा परि साहमाथि निर्मम तरिकाले रिसिबी साधेको स्थानीयहरुको भनाई छ ।
गदीयानीस्थित सार्वजनिक पोखरीको १० धुर जग्गामा करिब डेढ दशक पहिले तत्कालीन सात दलको निणर्यमा ब्रिलिएन्ट युवा क्लबले कार्यालय संचालनका लागि एक तल्ले भवन बनाइएको थियो । भवन निर्माण भएलगत्तै स्थानीय राजुल सहनीले सार्वजनिक जग्गामा भवन निर्माण गर्ने ब्रिलिएन्ट युवा क्लबविरुद्ध पर्सा जिल्ल अदालतमा मुद्दा दिएका थिए । उक्त मुद्दामा जिल्ला अदालतले क्लबको पक्षमा फैसला गरेपछि फैसला विरुद्ध सहनीले तत्कालीन पुननरावेदन अदालत हेटौंडामा पुनरावेदन गरेका थिए । पुनरावेदन अदालतले भने जिल्ला अदालतको फैसला उल्ट्याँउदै सहनीको पक्षमा फैसला गरेपछि क्लब सर्वोच्च अदालतमा पुगेको थियो । तर सर्वोच्च अदालतले भने पुनरावेदन अदालतको फैसलालाई सदर गर्दै सार्वजनिक पोखरीको जग्गामा बनाइएको उक्त भवन भत्काएर सार्वजनिक कायम गर्न फैसला गरेको थियो ।
त्यसपछि क्लबले उक्त भवन गाउँपालिकालाई जिम्मा लगाएको थियो । क्लबले जिम्मा लगाएपछि गाउँपालिकाले पालिकास्तरीय निणर्य गरेर उक्त भवनमा करिब डेढ वर्षदेखि पशु तथा कृषि उपशाखा कार्यालय संचालन गर्दै आएको थियो । यसका साथै गाउँपालिका अध्यक्ष वशिष्ठ गुप्ताले भवन पालिकाको स्वामित्वमा आइसकेकाले पालिकाले आफ्नो संरक्षणमा राखेर पशु तथा कृषि उपशाखा कार्यालय संचालनमा ल्याएको जानकारी सहितको निवेदन पर्सा जिल्ला अदालतमा दिएका थिए । तर शनिबार ईलाका प्रहरी कार्यालय पोखरियाका प्रहरी निरीक्षक राजन ढकाल नेतृत्वको टोलीले डोजर लगाएर भवन भत्काउने क्रममा स्थानीयले प्रतिवाद गरेपछि प्रहरीसँग झडप भएको हो । 
गाउँपालिका अध्यक्ष बशिष्ठ गुप्ताले भने पालिकासँग कुनै समन्वय नै नगरी जिल्ला प्रशासन कार्यालयले प्रहरी पठाएर जबरजस्ती भवन भत्काएको बताए । गाउँपालिकाको स्वामित्वमा रहेको भवन भत्काउनु पूर्व पालिकामा कुनै पनि निकायबाट पत्रसमेत नआएको र आधिकारीक रुपमा खबर पनि नगरिएको बताए । पशु कार्यालय संचालनमै रहेको अवस्थमा प्रहरीले डोजर लगाएर भवन भत्काउँदा भवनभित्र रहेका फर्निचर, उकरण, औषधी लगायतका गरि करिब १० लाख रुपैयाँको क्षति भएको छ । शुक्रबार प्रमुख जिल्ला अधिकारी दिनेशसागर भुसालले आफूलाई बोलाएर छलफल गर्ने क्रममा आफूले उक्त भवन नभत्काउन आग्रह पनि गरेको भन्दै गुप्ताले छलफलमा सिडिओ साबले अदालतको फैसला कार्यान्वयन गर्नैपर्छ भनेपछि पालिकासँग समन्वय गरेर मात्रै अगाडि बढ्न आग्रह गर्दा पनि शनिबार बिहान आफूलाई जानकारी नै नदिई अचानक प्रहरी र डोजर पठाएर भवन भत्काउन लगाएको बताए ।
यता प्रमुख जिल्ला अधिकारी भुसालले भने आफूले अदालतको फैसला कार्यान्वयन गर्न मात्रै लगाएको बताए । सार्वजनिक पोखरीको जग्गा पूर्ववत् अवस्थामै कायम गराउनु भन्ने सर्वोच्च अदालतको फैसला आएको र सर्वोच्चको उक्त फैसला कार्यान्वयन गराउन शनिबार प्रहरी र डोजर पठाएर भवन भत्काइएको बताए । उनका अनुसार पालिका अध्यक्षलाई बोलाएर छलफल गरि सर्वोच्च अदालतको निणर्यमा बाधक नबन्नु भन्दा पुनरविचार गर्नुहोला भनेर गएको बताए । 
प्रतिक्रिया दिनुहोस् !