वीरगंज (पर्सा), ३२ जेठ । विश्व रक्तदाता दिवसको अवसरमा शुक्रबार ब्लड डोनर्स एशोसिएसन नेपाल पर्साले १५६ संस्था र व्ययक्तिलाई सम्मान गरेकाे छ । वीरगंजस्थित हाेटेल मकालुमा भएको कार्यक्रममा ५० पोका भन्दा बढी रगत संकलन गर्ने ८१ वटा संस्था, निशुल्क रगत उपलब्ध गराउने रेडक्रससंग सम्झाैता गर्ने १७ ब्यक्ति र संस्थालाई सम्मान गरिएकाे ब्लड डाेनर्स एसाेसिएशन पर्साका सचिव अरबिन्द सिंहले वताए । साथै आकस्मिक रक्तदान गर्ने र गराउने ५५ जना व्यक्तिहरु पनि सम्मानपत्र सहित सम्मान गरिएकाे उनले वताए ।
ब्लड डोनर्स एशोसिएसन पर्सा शाखाले आयोजना गरेको कार्यक्रममा प्रमुख अतिथि नेपाल रेडक्रस सोसाईटी पर्सा शाखाका सभापति विरेन्द्रराज कडेल सहितका बिशिष्ट अतिथीहरुले सम्मानित संस्था र व्यक्तिहरूलाई सम्मान गरेका हुन् । सम्मान कार्यक्रमलाई सम्बाेधन गर्दै रेडक्रस पर्साका सभापति कडेलले याे बर्ष ५० हजार पाेका रगत संकलन गर्ने लक्ष्य रहेकाे वताए । उनले मधेश प्रदेशमा अरु कहीं रगत नपाए वीरगंज रक्त संचार केन्द्र आउन बतावरण बनाउन हाम्राे याेजना रहेकाे सुनाए ।
सभापति कडेलले रक्त संचार केन्द्र वीरगंजलाई प्रादेशिक रक्त संचार केन्द्र बनाउने प्रक्रिया अगाडी बढेकाे वताए । साथै रक्त संचार केन्द्रकाे भवन निर्माणकाे काम पनि अगाडी बढेकाे वताउँदै उनले आधुनिक किसिमकाे सुविधा सम्पन्न रक्त संचार केन्द्रकाे भवन निर्माण हुने जानकारी गराए ।
ब्लड डोनर्स एशोसिएसन पर्सा शाखाका अध्यक्ष शत्रुधन नेपालको अध्यक्षतामा भएकाे कार्यक्रममा नारायणी अस्पतालका निमित्त मेडिकल सुपरिटेन्डेण्ट डाक्टर खालिद हसन, प्रसौनी गाउँपालिकाका अध्यक्ष विनोद जयसवाल, पर्साका प्रहरी उपरीक्षक कुमोध ढुंगेल, बहुदरमाई नगरपालिकाकी उपप्रमुख सुष्मा कुश्वाहा, नेपाल पत्रकार महासंघ पर्साका उपाध्यक्ष युवराज खड्का लगायतको उपस्थिति रहेको थियो । संस्थाका सचिव अरविन्द सिंहले सहजीकरण गरेको कार्यक्रममा स्वागत संस्थाकी सदस्य रोशनी श्रेष्ठले गरिकी थिइन । 
प्रतिक्रिया दिनुहोस् !