जनकपुर, २६ जेठ । मधेस प्रदेशले नयाँ मुख्यमन्त्री पाएको छ । संघीयतापछि जनता समाजवादी पार्टीले नेतृत्व गर्दै आएको मधेसमा अब जनमत पार्टीले नेतृत्व लिएको छ । उपेन्द्र यादव नेतृत्वको जसपामा भएको विभाजन र त्यसपछिका राजनीतिक तरङ्गले मधेसमा नयाँ अवस्था सिर्जना भइरहेको छ ।
मधेस प्रदेशमा जनमत पार्टीका सतिशकुमार सिंह मुख्यमन्त्री बनेका छन् । सतिसकुमार मुख्यमन्त्री बन्ने विषयले जनमत पार्टीमा हलचल देखिएपनि मधेसले नयाँ गति लिने दलका नेताहरुले दाबी गरिरहेका छन् । मुख्यमन्त्री सिंहले १४ सदस्यीय मन्त्रिपरिषद् गठन गर्दै सपथ समेत लिइसकेका छन् । मुख्यमन्त्री सिंहले नवनियुक्त मन्त्रीको सपथ समेत गराएका छन् ।
सरकार विस्तारपछि उनले मधेसमा लगानी सम्मेलन गर्ने घोषणा समेत गरेका छन् । पदभार ग्रहणको क्रममा बोल्दै मुख्यमन्त्री सिंहले कृषी, डिजिटल तथ्याङ्कदेखि वैदेशिक रोजगारीबाट फर्किएकालाई व्यवस्थापन गर्नेदेखि मधेस प्रदेश लगानी सम्मेलन गर्ने घोषणा गरेका हुन् ।
राजनीतिलाई नयाँ मोडमा लैजाने दाबी गर्ने जनमत पार्टीले मधेसको नेतृत्व लिएसँगै मधेश प्रदेश सरकारले प्रत्यक्ष निर्वाचित सांसदलाई ५ करोड र समानुपातिक सांसदलाई डेढ करोड बजेट चलाउन दिने निर्णय गरेको छ ।
सतिशकुमारलाई जुरेको अवसर
गाउँपालिका अध्यक्षमा पराजित बनेका सतिशकुमार सिंह प्रदेसशभा सदस्य हुँदै मुख्यन्त्री बन्ने भाग्यमानी नेता बनेका छन् । उनी २०७९ को स्थानीय तहको निर्वाचनमा तिलाठी कोइलाडी गाउँपालिका अध्यक्षमा राजपाबाट उम्मेदवार भई पराजित भएका थिए ।
त्यसपछि उनी ०७९ भदौमा जनमत पार्टी प्रवेश गर्दै सप्तरीको निर्वाचन क्षेत्र नम्बर २(१) बाट प्रदेशका तत्कालीन अर्थमन्त्री शैलेन्द्रप्रसाद साहलाई पराजित गर्दै प्रदेशसभा सदस्यमा निर्वाचित भएका थिए ।
वुवा र छोराको संयोग
मधेसका मुख्यमन्त्री सिंहका वुवा शेखरकुमार सिंह राष्ट्रियसभा सदस्य छन् । २०७६ सालमा राष्ट्रियसभा सदस्यमा निर्वाचित भएका शेखरकुमार लोकतान्त्रिक समाजवादी पार्टीमा छन् । यसरी अहिले सतिशका वुवाको पार्टी केन्द्र र प्रदेशमा प्रतिपक्षी वेञ्चमा छ । तर, छोरा भने प्रदेशमा सत्तापक्ष बनेका छन् ।
मुख्यमन्त्री सतिसलाई १०७ सदस्यीय प्रदेश सभामा नेकपा एमालेका २४, जनमतका १३, नेकपा माओवादी केन्द्रका ९ र नेकपा एकीकृत समाजवादीका ७ सांसदसहित संघीय समाजवादी पार्टी र नागरिक उन्मुक्तिका एक÷एक सांसदहरुले समर्थन गरेका छन् ।
प्रतिक्रिया दिनुहोस् !