वीरगंज (पर्सा), २४ जेठ । गएराति आएको हावाहुरीले विद्युतीय पोल, ट्रान्सफर्मर एवं तारमा क्षति पुर्याउँदा वीरगंजमा करिब २४ घण्टा बिजुली अवरुद्ध भएको छ । बुधबार राति करिब १२ बजेतिर आएको हावाहुरीले वीरगंजको पावरहाउस चोक स्थित ३३ हजार केभिएको तार सहित पोल चुडिदा वीरगंजमा विद्युत प्रभावित भएको हो । पावर हाउस चोक स्थित ३३ हजार केभिएको तार सहितको पोल ११ हजार केभिएको तारमा झर्दा विद्युत प्रभावित भएको थियो ।
३३ हजार केभिएको तार झरेको कारण ५ वटा फिडरमा काम गर्न नसकिएको कारण विद्युत प्रभावित भएको विद्युत प्राद्यिकरण वितरण केन्द्र वीरगंजका प्रमुख अवधेश कुमार दुबेले जानकारी दिए । उनका अनुसार हावाहुरीले तार, पोल एवं ट्रान्सफर्मरमा पनि ठूलो क्षति पुर्याएको हो । हावाहुरीको कारण २ वटा ट्रान्सफर्मर जलेको तथा ३० वटा पोल ढलेको र मर्मत कार्य तिब्र रुपमा भइरहेको बताए । वीरगंज बजारभरिको विद्युत प्रशारणको क्रममा ठाउँ ठाउँमा स्वीच जडान गरिएको कारण क्षति नभएको क्षेत्रमा बिहीबार करिब ११ बजेदेखि नै विद्युत प्रशारण भइसकेको र बाँकी ठाउँमा प्राविधिक मर्मत कार्य भइरहेको बताए ।
वीरगंज बजार क्षेत्रमा करिब १ सय ५० ठाउँमा स्वीच जडान गरिएको छ, ७० वटा स्थानमा भर्खरै केही दिन अगाडि जडान गरिएको प्रमुख दुबेको भनाई छ । ठाउँ ठाउँमा स्वीच जडान गरिएको कारण विद्युत अवरुद्ध भएको ठाउँमा मात्रै लाइन काटेर मर्मतको कार्य गर्न सजिलो भएको बताए । मर्मत कार्य चलि रहँदा क्षति नभएको कारण निर्वाध रुपमा विद्युत प्रशारण यथावत रहेको बताए ।
केही दिनदेखि वीरगंजमा विद्युत ट्रिपिङ्गको समस्याबारे जानकारी दिदै केन्द्र प्रमुख दुबेले एल.डि.सि. (लोड डिस्पैच सेन्टर) अर्थात भार सम्प्रेशन केन्द्रबाट नै विद्युत ट्रिपिङ्ग हुने गरेको बताए । बढ्दो गर्मीसँगै विद्युत प्रशारणमा लोड क्षमता बढ्दै जाने गरेको र भार सम्प्रेशन केन्द्रले नै बिद्युत ट्रिपिङ्ग गर्ने गरेको बताए । वीरगंज स्थित वितरण केन्द्रमा त्यसको स्टेशन हुँदाहुँदै आफूहरुको मातहतमा त्यो संचालन नभई भार सम्प्रेशन केन्द्रको निर्देशनमा संचालन हुने भएकोले त्यहाँबाट नै बिद्युत ट्रिपिङ्ग हुने गरेको बताए ।
देशभरिकै विद्युतको पावरलाई कन्ट्रोल गर्ने (भार सम्प्रेशन केन्द्र) लाई आफूहरुले पनि विद्युत ट्रिपिङ्गको समस्याबारे जानकारी गराएको उनको भनाई छ । विद्युत प्रवाहमा प्राविधिक कुराहरु धेरै हुने भएकोले सर्वसाधारणलाई सम्पूणर् कुरा जानकारी नभएको कारण विद्युत प्रभावित भएपछि वीरगंज वितरण केन्द्रकै आरोप लगाउँदै आएकोमा त्यस्तो नभई प्राविधिक समस्याबारे सबैले बुझिदिन आग्रह पनि गरे । उनले भने ‘यही वितरण केन्द्र पावरहाउस चोक स्थित नै ३३ हजार केभिएको प्रशारण लाइनको पोल ढलेको छ, जबसम्म यसलाई ठड्याएर तार तानिँदैन, तबसम्म विद्युत प्रवाह गर्न सकिँदैन र यो चाँडै हुने कुरा पनि होइन’, यसमा केही समय लाग्ने भएकाले सर्वसाधारण धैर्य गरिदिन आग्रह गर्दै प्राद्यिकरणले २४ औं घण्टा आफ्नो काम गरि रहेको बताए ।
प्रतिक्रिया दिनुहोस् !