वीरगंज (पर्सा), २० जेठ । नेपाल भारत सीमावर्ती भारतीय बजार रक्सौल निवासी तस्कर मुख्तार अलीलाई पर्सा प्रहरीले पक्राउ गरेको छ । तस्करीको लाइन खोलाउन पर्साको अमरपट्टी प्रहरी चौकी पुगेका मुख्तारलाई जिल्ला प्रहरी कार्यालय पर्साको टोलीले पक्राउ गरेको हो । प्रहरीको नामले पैसा असुल्दै प्रहरीलाई बदनाम गराउँदै हिँडेका भारतको रक्सौल निवासी मुख्तारलाई अमरपट्टीबाट पक्राउ गरिएको पर्साका प्रहरी उपरीक्षक कुमोध ढुँगेलले जानकारी दिए ।
सीमावर्ती क्षेत्रमा लामो समयदेखि अवैध कारोबारमा संलग्न रहेका मुख्तार पछिल्लो समय जिल्लाको एसपी र क्राइम टोलीसँग ‘सेटिङ’ भइसकेको भन्दै अवैध कारोबारीहरुसँग पैसा असुल्दै आएका थिए । तीन चक्के टेम्पोमा वीरगंज भन्सारको मुख्य नाका शंकराचार्य गेट हुँदै ‘कपडा र किराना सामानको तस्करी गर्ने मुख्तारले जिल्लामा आएका नयाँ अधिकृतलाई सीमा क्षेत्रको अर्कै नाकाबाट तस्कहरी भइरहेको भन्ने गलत सूचना समेत दिएर प्रहरी टोली अर्को ठाउँमा व्यस्त गरेर मुख्य नाकाबाटै सजिलै तरिकाले सामान नेपाल पठाउने गर्दथे ।’
प्रहरीका अनुसार मुख्तारले माथि सेटिङ भइसकेको भन्दै नाकामा खटिएका प्रहरी चौकी इन्चार्जलाई तस्करीको लाइन खोल्न प्रलोभन समेत दिएका थिए । विगतमा मुख्तारले विभिन्न तहका प्रहरी कर्मचारीको पैसा मिटर ब्याजमा समेत लगाउने गरेको बताइएको छ । सरुवा भएका कतिपय हाकिमको पैसा उनले अझै तिर्न बाँकी रहेको बताइएको छ ।
प्रतिक्रिया दिनुहोस् !