मलंगवा (सर्लाही), ४ वैशाख । सट्टेबाजी गराएर २ वर्षमै ४ करोड कमाइ गरेको देखिएपछि सर्लाहीका तीन जनालाई प्रहरीले पक्राउ गरेको छ । पक्राउ परेकामध्ये मलंगवा नगरपालिका-९ का ३१ वर्षीय सञ्जयकुमार साहलाई प्रहरीले सट्टेबाजी धन्दाको मुख्य एजेन्ट भनेको छ । उनलाई काठमाडौं उपत्यका अपराध अनुसन्धान कार्यालयको टोलीले सर्लाहीबाट पक्राउ गरेर ल्याएको छ । अनुसन्धानका क्रममा साहको निर्देशनअनुसार काम गरेको देखिएको भन्दै प्रहरीले मलंगवा नगरपालिका-९ कै १९ वर्षीय रामजी साह र मलंगवा-१० का ३० वर्षका राकेश चौधरीलाई पनि पक्राउ गरेको छ ।
रामजी सञ्जयकै पसलमा काम गर्ने व्यक्ति रहेको खुलेको छ राकेश भने सट्टेबाजीको धन्दामा सहयोगीको रुपमा भूमिकामा रहेको प्रहरीको भनाइ छ । सञ्जय भने सट्टेबाजी गराउने विभिन्न गिरोहको नेपालस्थित मुख्य एजेन्ट रहेको प्रहरीले जनाएको छ । सञ्जयमार्फत पछिल्लो दुई वर्षमा सट्टेबाजीको ५७ करोड ४१ लाख ५७ हजार १४७ रुपैयाँको कारोबार भएको अनुसन्धानमा संलग्न एक अधिकारीले बताए । सट्टेबाजीको रकम क्रिप्टो (भर्चुअल मुद्रा) मार्फत भुक्तानी हुने गरेको देखिएको छ । सञ्जय वान एक्स बेटिङका नेपाली एजेन्ट रहेको खुलेको छ ।
सञ्जयले सट्टेबाजी गराउनुका साथै क्रिप्टो करेन्सीको समेत कारोबार गरेको देखिएको अपराध अनुसन्धान कार्यालयका एसपी तथा प्रवक्ता रवीन्द्र रेग्मीले बताए । प्रहरीका अनुसार दुई वर्ष अघिसम्म सञ्जयको आर्थिक अवस्था सामान्य थियो । तर अहिले सर्लाहीको सदरमुकाम सदरमुकाममा घर-घडेरी जोडेका छन् । सञ्जयको मलंगवामा लक्ष्मी फोटोकपी सेन्टर, लक्ष्मी मोबाइल स्टोर र जनता गार्मेन्ट नामको पसल छ । तर यी पसलको आवरणमा भित्री रुपमा सट्टेबाजी गराएर धेरै रकम कमाएको देखिएको अपराध अनुसन्धान कार्यालयका अनुसन्धान अधिकृत डीएसपी किरण न्यौपानेले बताए ।
लक्ष्मी कम्युनिकेशन एण्ड फोटोकपी सेन्टरमार्फत सञ्जयले सीमकार्ड समेत बेच्दै आएका थिए । सीमकार्ड किन्न विभिन्न व्यक्तिले पेश गरेको कागजात दुरुपयोग गरेर सञ्जयले बैंक खाता खोल्नेदेखि सट्टेबाजीको एकाउन्ट खोल्ने र सट्टेबाजी गराउने गरेको अनुसन्धानबाट खुलेको छ । प्रहरीले सञ्जयको साथबाट २१ वटा मोबाइल बरामद गरेको छ । सञ्जयले ९८ वटा बैंक खाता खोलेर कनेक्ट आईपीएसमा कनेक्ट गरी कारोबार गरेको भेटिएको थियो । अहिलेसम्म उनले ५७ करोड ४१ लाख रुपैयाँ भन्दा बढीको कारोबार गरेको देखिएको छ ।
नेपाली एजेन्ट बनेर सट्टेबाजी गराए वापत उनले ७ प्रतिशत कमिसन लिने गरेको पाइएको प्रहरीको भनाइ छ । आफूले बुझेको ७ प्रतिशतबाट २ प्रतिशत रकम भने सट्टेबाजीका लागि आफ्नो टेलिफोन नम्बरको विज्ञापन गरिदिएवापत वान एक्स बेटको डिस्प्ले एजेन्टलाई बुझाउने गरेको खुलेको छ । उनले गरेको कारोबारको ५ प्रतिशत कमिसन हिसाब गर्दा ४ करोड रुपैयाँ आफूले लिएको देखिएको एक अनुसन्धान अधिकृतले बताए । उनले एक महिनाअघि मात्रै सदरमुकाम मलंगवामा श्रीमतीको नाममा ६३ लाखमा घडेरी किनेको खुलेको छ । मलंगवामै २३ लाखमा घर पनि खरिद गरेको देखिएको छ ।
पक्राउ परेकाहरुविरुद्ध सार्वजनिक हित, स्वास्थ्य, सुरक्षा, सुविधा र नैतिकताविरुद्धको कसुर अन्तर्गत दफा १२५ को जुवा खेल्न वा सट्टाबाजी गर्न नहुने कसुरमा अनुसन्धान अघि बढाइएको छ । साभार : अनलाइनखबर 
प्रतिक्रिया दिनुहोस् !