वीरगंज (पर्सा), २ वैशाख । तराई मधेसको साझा सांस्कृतिक धरोहरका रुपमा मनाइने चैती छठ पर्व तराईका जिल्लाहरूमा आइतबार धुमधामका साथ मनाइँदैछ । छठ पर्वको मुख्य दिन दिन आज आइतबार साँझ ब्रतालुहरुले अस्ताउँदो सुर्य र छठी मातालाइ अर्घ दिएर छठी माताको पूजा गरि रहेका छन् । तराईमा छठ पर्ब कार्तिक र चैत शुक्ल पक्षमा गरी वर्षमा दुई पटक मनाइने गरिन्छ ।
चैत शुक्लपक्षमा चार दिनसम्म मनाइने चैती छठ पर्वको तेश्रो दिन (आज आइतबार) अर्थात षष्ठी तिथीलाई छठको मुख्य दिन मानिन्छ । जसलाइ सँझीया घाटे पनि भनिन्छ । छठको मुख्य दिन आज आइतबार साँझ ब्रतालुहरुले नदी, पोखरी, तलाउ लगायतका जलाशयमा तयार पारिएको छठ घाटमा पुगेर अस्ताउँदो सुर्य र छठी मातालाइ अर्घ दिएर छठ पर्व मनाइरहेका छन् ।
सुर्य भगवान र छठी मातालाइ पूजापाठ र अर्घ दिनका लागि गहुँ वा चामलको पिठोबाट ठेकुवा बनाउने गरिन्छ । यस्तै मुला, गाजर, बेसारको हरियो बेर्ना, ज्यामिर, नरिवल, सुन्तला, केरा, स्याउ, पानी सिंगडा, सुथनी, उखु लगायतका फुलफुल पनि सुर्य भगवान र छठी मातालाइ अर्घ दिने गरिन्छ । छठ पर्वमा व्रत बसी सुर्य भगवान र छठी माताको पुजा गरेमा पारिवारीक सुख, समृद्धि, पुत्र प्राप्ती र मनोकामना पुरा हुने धार्मीक विश्वास रहेको छ ।
शुक्रबारदेखि शुरु भएको छठ पर्व सोमबार बिहान उदाउँदो सुर्यलाई अर्घ दिएर पुजापाठ गरेपछि चैती छठ पर्ब विधिवत रुपमा समापन हुनेछ । चैते छठका लागि वीरगंजको घडिअर्वा पोखरी, रानीघाट, नगवा, मुर्ली, छपकैया, इनर्वा लगायतका स्थानमा रहेका जलाशयलाई छठीघाटको रुपमा सरसफाइ गर्नुका साथै सिँगारिएको छ ।
चैती छठ तराई मधेशमा मनाउने चलन भएपनि पछिल्ला वर्षमा अन्य क्षेत्रमा पनि यसको महत्व बढ्दै गएको छ । चार दिनसम्म विधिवतरूपमा मनाइने यो पर्वको पहिलो दिन तृतीया तिथिलाई नुहाएर चोखो भई शुद्ध खाना खाइन्छ, जसलाई नहाय खान पनि भनिन्छ । दोश्रो दिन खरना विधि हुन्छ भने तेश्रो दिन साँझ अस्ताउँदो सुर्यलाई अर्घ दिइने गरिन्छ । त्यसको भोलिपल्ट चौथो दिन उदाउँदो सुर्यलाई अर्घ दिएर चैते छठ सम्पन्न गरिने परम्परा छ । 
प्रतिक्रिया दिनुहोस् !