गौर (रौतहट), ३ चैत । रौतहटको परोह नगरपालिका स्थित मनी ट्रान्सफरका संचालकमाथि गोली प्रहार गरेको आरोपमा पक्राउ परेका ३ जना भारतीय युवकलाई प्रहरीले सार्वजनिक गरेको छ । शुक्रबार दिउँसो करिब १ बजेको समयमा परोहा नगरपालिका-९ स्थित शिव मनी ट्रान्सफरका संचालक २६ वर्षीय नितेश साहमाथि गोली प्रहार गरिएको थियो । गोली प्रहार भए लगत्तै स्थानीयहरुले हतियारधारी समूहका ३ जनालाई पक्राउ गरि कुटपिट गर्दै प्रहरीको जिम्मा लगाएको थियो ।
घटना भएलगत्तै रौतहट प्रहरीले तीनजना भारतीय युवकलाई पक्राउ परेको जिल्ला प्रहरी कार्यालय रौतहटकी प्रहरी नायब उपरीक्षक (डीएसपी) एलिजा गिरीले जानकारी दिइन् । पक्राउ पर्नेमा भारतीय नागरिक १९ वर्षीय मुनिफकुमार यादव, १८ वर्षीय राजकुमार पासवान र २० वर्षीय चन्द्रभान सिंह रहेका छन् । उनीहरुमाथि ज्यान मार्ने उद्योग, हातहतियार तथा खरखजाना र चोरीसम्बन्धी कसुरमा अनुसन्धान भइरहेको रौतहट प्रहरीले जनाएको छ ।
प्रहरीले उनीहरुको साथबाट मोटरसाइकल, पेस्तोल, सो मा प्रयोग हुने गोली लगायतका सामान बरामद गरेको छ । गोली प्रहारबाट घाइते भएका नितेशको बाराको परवानीपुरस्थित एल.एस. न्यूरो अस्पतालमा उपचार भइरहेकोमा आँखामा समस्या देखिएकोले थप उपचारका लागि काठमाडौंको तिलगंगा आँखा अस्पताल पठाइएको प्रहरीले जनाएको छ ।
प्रतिक्रिया दिनुहोस् !