वीरगंज (पर्सा), ३० फागुन । वीरगंज महानगरपालिका-२४ रामगढवामा सोमबार राति दाइजोको निहुँमा विवाद उत्पन्न भई विवाह रद्द भएको घटनामा केटा पक्षलाई फसाउन केटी पक्षले विभिन्न प्रपञ्च रचेको पाइएको छ । बारा जिल्ला कलैया उपमहानगरपालिका-४ निवासी २८ बर्षीय उमेश साह गोढ र वीरगंज महानगरपालिका-२४ निवासी २४ वर्षीय रमिता कुमारीको यही फागुन २८ गते विवाह तय भएको थियो । दुई वर्ष अघिदेखि प्रेममा रहेका वीरगंज महानगरपालिकाको स्वास्थ्य शाखामा करारमा कम्प्युटर पदमा कार्यरत उमेश र नारायणी अस्पतालको ल्याबमा कार्यरत रमिताको एक वर्ष अघि २०२३ जनवरी २१ तारेखमा टिकाटालो भएको थियो । एक वर्ष पश्चात यही २०८० फागुन २८ गते विवाह तय भएकोमा विवाहकै दिन कन्या निरीक्षण गर्ने क्रममा गहना चढाउने विषयमा विवाद भई झडप हुँदा विवाह नै रद्द भयो ।
विवाह रद्ध पश्चात पर्सा प्रहरीले दाइजोको निहुँमा विवाद रद्द गरेको भन्दै बेहुला पक्षका ६ जनालाई पक्राउ गर्यो । पक्राउ परेकाहरुमध्ये ५ जना विरुद्ध पर्सा प्रहरीले अनुसन्धान प्रक्रिया अगाडि बढाएको छ । कन्या निरीक्षण गर्ने क्रममा गहना चढाउने विषयमा विवाद भई झडप हुँदा प्रहरीले बेहुलासहित ६ जनालाई नियन्त्रणमा लिएको थियो । नियन्त्रणमा लिएको ६ जनामध्ये ५ जना विरुद्ध विवाह सम्बन्धी कसुरमा २ दिन म्याद थप अनुमति लिई अनुसन्धान प्रक्रिया अगाडि बढाएको जिल्ला प्रहरी कार्यालय पर्साले जनाएको छ ।
विवाह रद्द भएपछि दाइजोमा सुनको सिक्री नदिएको निहुँमा केटा पक्षले विवाद रद्द गरेको भनेर केटी पक्षले आरोप लगायो । एकदिनको छलफल पश्चात विवाद नमिलेपछि फागुन २९ गते साँझ केटी पक्षले जिल्ला प्रहरी कार्यालय पर्सामा जाहेरी दियो र केटा पक्षका बेहुला सहित बुवा, भाई, भिनाजु गरि ५ जनालाई पर्सा प्रहरीले पक्राउ गरि विवाह सम्बन्धी कसुरमा अदालतबाट २ दिन म्याद थप अनुमति लिई अनुसन्धान प्रक्रिया अगाडि बढायो । बेहुलीका भाई सुजित साहका अनुसार दाइजोमा बेहुला पक्षलाई नगद आठ लाख ५० हजार रुपैयाँ, मोटरसाइकल बापत नगद ३ लाख २५ हजार रुपैयाँ, ६५ हजार रुपैयाँको एक थान ल्यापटप, करिब ४० हजार रुपैयाँ मुल्यको सुनको सिक्री दाइजो वापत दिईसकेको अवस्थामा विवाह मण्डपमै बेहुला र उनका भिनाजुले दाइजोमा थप सुनको सिक्री नपाएको निहुँ खोजेपछि झडप आरोप लगाए ।
यता बेहुला पक्षले बेहुला र बेहुलीको दुई वर्षदेखि प्रेम सम्बन्ध रहेको कारण दाइजोको कुनै कुरा नै नभएको दाबी गरेका छन् । बेहुला उमेश साहको घरायसी अवस्था पनि खासै राम्रो नभएको र सम्पत्तिको नाममा तीन दाजुभाईको बीचमा एउटा कच्ची घर छ । दुई वर्षदेखि प्रेम सम्बन्धमा रहेका दुबैजना मन्दिरमा आफै विवाह गर्ने मनसायमा रहेको अवस्थामा परिवारले दुबैजनालाई रितिरिवाज अनुसार विवाह गर्ने सहमति गरेका थिए । यस्तो घरमा २० लाख रुपैयाँ दाइजो कसले दिन्छ ? भन्दै बेहुलाका आफन्तले कन्या निरीक्षण गर्न गएका आफन्तहरुलाई बेहुली पक्षले नै कुटपिट गरि उल्टै दाइजोको आरोप लगाएको बताए ।
केटी पक्षको मामा र भाई एवं केटा पक्षको भिनाजुको आपसी विवादको कारण यो विवाह भाँडिएको स्थानीयको भनाई छ । स्थानीय भद्रभलादमीका अनुसार दाइजोको बहाना बनाएर केटा पक्षलाई बद्नाम गराउने काम भएको आफूहरुको बुझाई छ । आफ्नो कर्तुत लुकाउनको लागि दाइजोको बहाना बनाएको उनीहरुले बताए । उनीहरुको अनुसार बेहुलीको मामा पर्ने एकजना पत्रकारले नै सबै योजना बनाएर विवाह भाँडेर पत्रकारिताको आडमा बेहुला पक्षलाई एकतर्फी बद्नाम गराउने काम गरेको बताए । उनीहरुले यस घटनामा केटा पक्षको कुरालाई बुझेर पनि मिडियावाजी गर्न सञ्चारकर्मीहरुलाई स्थानीयहरुले आग्रह गरे ।
यता बेहुली पक्षलाई नै आधार बनाई पर्सा प्रहरीले बेहुला पक्षलाई पक्राउ गरि कारवाही प्रक्रिया अगाडि बढाएको छ । तर विस्तृत खोजविनको क्रममा बेहुला पक्ष भन्दा पनि बेहुली पक्षका मामा र भाईको योजनामा विवाह भाँडिएको र नभएको विषयलाई मिडिया एवं सामाजिक सञ्जालमा भ्रम छरिएको पाइएको हो । केटीको मामा, भाई र केटाको भिनाजुबीच पहिलादेनि विवाद रहेकोमा केटीको मामा पर्ने पत्रकारले विवाद उत्पन्न गराएको र रातिको समयमा भिडियो बनाई प्रहरीलाई बोलाई बेहुला सहितका परिवारलाई बुझाएको जन्तीमा सहभागीहरुको भनाई छ ।
विवाह रद्द भए पश्चात मंगलबार विहान वडा प्रहरी कार्यालय श्रीपुरमा भएको छलफलको क्रममा सहमति जुट्न सकेन । छलफलको क्रममा बेहुली रमिताले उमेशसंग विहे नगर्न अडान राखेकी थिइन । उनले भनिन “दाइजोकै लागि मेरो घरपरिवारको इज्जत लिलाम गर्ने केटासंग म विहे गरेर बस्न सक्दिँन । म उसंग कुनैपनि हालतमा विहे गर्न सक्दिन ।’ उनले थपिन्, ‘दाइजोकै लागि मजस्तै अरुपनि चेलीबेटी र उसको परिवारको यस्तो नहोस् अनि दाइजोका लोभीलाई सबक होस् भनेर मैले यो निणर्य लिएकी हुँ ।’
प्रतिक्रिया दिनुहोस् !