वीरगंज (पर्सा), २१ फागुन । साल्ट ट्रेडिङ्ग कर्पोरेशन लिमिटेड, प्रादेशिक कार्यालय वीरगंजका कार्यालय प्रमुख अमोज लामिछाने विगत १८ वर्षदेखि एउटै कार्यालयमा रजाई गर्दै आएका छन् । पहुँच, पावर, पैसाको आडमा मन्त्रालय एवं साल्ट ट्रेडिङ्ग कर्पोरेशन लिमिटेको केन्द्रिय कार्यालयका कर्मचारीहरुलाई प्रलोभनमा पारी वीरगंज स्थित प्रादेशिक कार्यालयमै विगत १८ वर्षदेखि रजाई गर्दै आएका हुन् ।
उनी आएदेखि यहाँ कति कर्मचारी आए, गए तर उनी जहाँको त्यही छन् । उनलाई यहाँबाट सरुवा गर्ने मन्त्रालय एवं केन्द्रिय कार्यालयको समेत अधिकार नभएको जस्तो व्यवहार गर्ने गरेको छ । स्थानीय तहदेखि केन्द्रसम्मको मन्त्री, साल्ट ट्रेडिङ्ग कर्पोरेशन लिमिटेड केन्द्रिय कार्यालयको कर्मचारीहरुलाई प्रलोभनमा पारी आफ्नो अनुकल साल्ट ट्रेडिङ्गको मलमा खुलेयाम हिनामिना गर्ने गरेको श्रोतले जनाएको छ । उनी वीरगंजमा कार्यालय प्रमुख भएर आएदेखि लाखौं लाख बजेट अवैध रुपमा कुम्ल्याएको बताइएको छ ।
कृषकहरुको लागि आयातित मलमा लोड, अनलोड, ढुवानी, गोदाम भाडा लगायतका विषयमा चलखेल गरि लाखौं रकम बजेट हिनामिना गर्ने गरेको बताइएको छ । उनलाई मन्त्रालय एवं केन्द्रिय कार्यालयले वीरगंजबाट सरुवा गर्न नसकेको हो ? वा उनी राजनीतिक दलको पुच्छर समातेर यही वीरगंजमै १८ वर्षदेखि रजाई गर्दै आएका छन् यो खोजविनको विषय हो ? विगतमा कृषकहरुको लागि चाहिने मलमध्ये ७० प्रतिशत कृषि सामाग्री कम्पनी तथा ३० प्रतिशत साल्ट टे्रडिङ्गलाई दिने गरेको अवस्थामा गत २०७९/०८० मा शत प्रतिशत बजेट ल्याउन सफल भएका थिए ।
केही दिन अघि मात्रै उनको काला कर्तुत विभिन्न सञ्चारमाध्यममा प्रकाशित भएपछि भाडाका युटुबर लगाएर आफ्नो सफाई दिएका दिएर चोखो बन्ने प्रयास गरेका थिए । साल्ट ट्रेडिङ्ग कर्पोरेशन लिमिटेड, वीरगंजले भिजेको युरिया मलको बोरा रि-प्याकिङ्ग गरि विक्री गरेको घटना बाहिरिएको थियो । गत भदौको तेश्रो हप्तामा साल्ट ट्रेडिङ्ग कर्पोरेशन लिमिटेड वीरगंज कार्यालयले आयात गरेको २० हजार मेट्रिकटन मध्ये भिजेको युरिया मललाई रि-प्याकिङ्ग गरेर विक्री गरिएको समाचार बाहिरिएपछि वीरगंजमा भाडामा पाउने युटुबरलाई प्रयोग गरि आफ्नो सफाई दिदै चोखो बन्ने प्रयास गरेका हुन् ।
नेशनल ट्रेडिङ्ग स्थित साल्ट ट्रेडिङ्गको गोदाममा अनलोड गर्न पुगेको ना. ३ ख ४०३३ नम्बरको टिपरमा लोड रहेको युरिया मलको बोराबाट तपतपी पानी चुहि रहेकै अवस्थामा यस अनलाइनले फेला परेको थियो । त्यस बखत समाचार संकलन गर्न गएका सञ्चारकर्मीमाथि गोदामका पालदारले दुव्र्यवहार गर्दै मोबाइल समेत खोसेका थिए । त्यस बखत कार्यालय प्रमुख अमोज लामिछानेसँग बुझ्दा भिजेको मलको भुक्तानी नगरिने बताएका थिए । त्यस बखत भिजेको मललाई आफूहरुले ठेकेदार कम्पनीलाई फिर्ता गरिदिने बताएका थिए तर हाल त्यही मल आयातकर्ता ठेकेदार कम्पनीसँगको मिलोमतोमा साल्ट ट्रेडिङ्गले बोरा रि-प्याकिङ्ग गरि विक्री गरेको बताइएको छ ।
नेपाल सरकारले मल आयात गर्ने ठेकेदार कम्पनीसँग गरेको सम्झौता अनुसार सुरक्षित तरिकाले गोदाममा मल आए पश्चात चेकजाँच गरेर मात्रै भुक्तानी गर्ने गरिएको र गुणस्तरमा कमी पाए भुक्तानी नहुने बताएपनि हाल त्यही भिजेको गुणस्तरहीन मल साल्ट ट्रेडिङ्ग कर्पोरेशन लिमिटेडले नै विक्री गरेको छ ।
यसबारे साल्ट ट्रेडिङ्ग कर्पोरेशन लिमिटेड, वीरगंजका प्रादेशिक प्रमुख अमोज लामिछानेले भिजेको युरिया मल आधा मूल्यमा विक्री गरेको आफै स्वीकारेका थिए । उनले भिजेर आएको युरिया मल किसानलाई नभई अन्य रुखविरुवा, पोखरी लगायतमा प्रयोग गर्नको लागि विक्री गरिएको बताएका थिए । उनले नेपाल सरकारले कृषकलाई वितरण गरिने मलमा मात्रै अनुदान दिने भएको कारण भिजेको मलको सरकारले अनुदान पनि नदिने र यस नियमानुसार नै आधा मूल्यमा विक्री गरिएको बताएका थिए । तर उनले आयात गर्ने ठेकेदारसँग मिलोमतो गरि भिजेको मल नै रि-प्याकिङ्ग गरि विक्री गरेका थिए ।
साल्ट ट्रेडिङ्ग कर्पोरेशन लिमिटेडमा आउने मल वितरणमा कार्यालय प्रमुख अमोज लामिछानेले मनोमानी गर्ने गरेका छन् । युरिया, डिएपी भन्दा पनि पोटासमा कोटा सिस्टम नभएको कारण कार्यालय प्रमुख लामिछानेले आफ्नो मनोमानी तरिकाले पोटास वितरण गर्ने गरेको बताइएको हो । बारा, पर्सा र रौतहटका कृषि सहकारीहरुले यहीबाट मल उठाउने गरेका छन् । त्यसै क्रममा पोटास मलमा कोटा सिस्टम नभएको कारण कार्यालय प्रमुखले आफ्नो मनोपोली तरिकालबाट मल दिने गरेको सेवाग्राहीहरुको आरोप छ ।
यति मात्रै होइन, कार्यालय प्रमुख लामिछानेले गहुँको वीउ वृद्धिमा पनि घोटाला गर्ने गरेका छन् । किसानलाई गहुँको वीउ वृद्धि गर्नको लागि नेपाल सरकारले मल, वीउमा अनुदान दिने गरेको छ तर त्यो मल, वीउ किसानसम्म पुग्दैन, त्यो मल डिलरवालाहरुलाई विक्री गर्ने गरेको बताइएको छ । कुन किसानले साल्ट टे्रडिङ्गको वीउ वृद्धि गरेको हो, त्यसको कुनै तथ्याँक छैन, तर कमिशनको लागि उनले कृषकलाई नभई मल, वीउ डिलरलाई मल, वीउ विक्री गर्ने गरेका छन् ।
प्रतिक्रिया दिनुहोस् !