‘मधेसमा नयाँ विद्रोह गर्ने तयारीमा’ सीके राउतदेखि राजेन्द्र महतोसम्म….. !

वीरगंज (पर्सा), १५ फागुन । २०७२ सालमा नयाँ संविधान जारी हुँदै गर्दा तराई मधेसका जिल्ललाहरुमा ठूलो विद्रोह भएको थियो । मधेसवादी दलहरुको आन्दोलनलाई समर्थन जनाउँदै अघोषित नाकाबन्दी नै गरेको थियो । संविधानप्रति असन्तुष्ट जनाएको मधेसले अहिले पनि संविधान संशोधनको मागलाई काममै राखेको छ । तर मधेसवादी दलहरुको विभाजनका कारण आन्दोलन उठान हुन सकेन । पछिल्लो समय सीके राउतले ‘स्वतन्त्र मधेस’को भन्दै राज्य विखण्डनको नारा लगाए । मधेस विद्रोहबाट उदाएका सीके राउत यतिबेला संसदमा छन् । मधेसका अन्य दलहरुलाई जनताले पत्याउन छाडेका छन् । अब फेरि कुनै न कुनै रुपबाट मधेसमा आन्दोलन उठाउने प्रयास भने जारी नै छ ।

६२/६३ को जनआन्दोलनपछि संघीयताको लागि मधेसले भीषण विद्रोह गर्यो । पहिचान र संघीयताको पक्षमा भएको आन्दोलनहरु मध्ये मधेस विद्रोह नै उच्च विद्रोहको रुपमा खडा भयो । पहिचानको पक्षमा प्रदेश नामाकरण गर्न मधेस सफल भए पनि अन्य मुद्दाहरु भने थाती नै छन् । त्यसैले मधेसमा पटक पटक विद्रोहका श्वरहरु घन्किरहेका छन् । मधेसी जनताको मुक्तिको आवाज उठाएर थुप्रै मधेसी नेताहरु सांसद छिरे । राष्ट्रपतिदेखि उपप्रधानमन्त्री हुँदै थुप्रै मन्त्रीहरु मधेसले पाए पनि जनताले त्यसको प्रत्याभूति गर्न पाएका छैनन् । मधेसका मुद्दा बोकेर थुप्रै उदाएका छन् ।

पछिल्लो पटक स्वतन्त्र मधेसको मुद्दा उठाएर चर्चामा आएका सीके राउत पनि अहिले संसदमा छन् भने उनको दल सत्तामा छ । सत्ता गठबन्धनमै रहेका उनी मधेस अझै पनि हेपिएको आवाज संसदमा उठाइरहेका छन् । स्वतन्त्र मधेसको आन्दोलन हुँदै किसान आन्दोलन चर्काएर मधेसमा नयाँ आन्दोलनको विजारोपण गरेका राउत अहिले फेरि नौलो गणतन्त्रको आवाज उठाउँदै तेस्रो जनआन्दोलनको तयारीमा छन् । विद्यमान गणतन्त्रले देशको समस्या समाधान नभएको भन्दै राउतले आइतबार मात्रै नौलो गणतन्त्रका लागि जनआन्दोलन गर्ने घोषणा गरेका थिए ।

राउतले आन्दोलन घोषणा गरेको भोलिपल्ट सोमवार मधेसका अर्का नेता राजेन्द्र महतोले लोकतान्त्रिक समाजवादी पार्टी (लोसपा) परित्याग गर्दै मुक्ति क्रान्ति अभियान घोषणा गरेका छन् । उनले फेरि बहुल राष्ट्रको आवाज उठाएका छन् । नेता महतोले मात्र होइन, मधेसका अधिकांश राजनीतिक राजनीतिक दलका नेताहरुले राष्ट्रिय दलका नेताहरूको स्वेच्छाचारी र तानाशाही प्रवृत्ति रहेको भन्दै आलोचना गर्दै गर्ने गरेका छन् । मधेसी जनताको आवरणमा उदाएका नेताहरु आफूलाई मधेसका मसिहा ठान्ने ठान्ने गरेका छन् । सधैं सधैं मधेसका जनतालाई आन्दोलनमा होमेर आफ्नो स्वार्थको रोटी सेक्ने काम गरिरहेका छन् । मधेसी जनतालाई ढाल बनाएर सत्ताको स्वाद चाखिरहने नेताहरुलाई भने मधेसी जनता चिन्न जरुरी छ ।