वीरगंज (पर्सा), १६ माघ । बाराको फेटा गाउँपालिका वडा नं. १ त्रिवेणी टोल निवासी हरिन्द्र महतोले आफ्नै छोरीको विभत्सव हत्या गरेको घटना खुलासा भएको छ । तल्लो जातको युवकसँग प्रेममा रहेको गाउँमा हल्लाभएपछि महतोले अन्दाजी १६ वर्षीय आफ्नै छोरीलाई विभत्सव हत्या गरि पर्साको जगरनाथपुर स्थित खोलामा फालेको रहस्या बाहिरिएको हो । पर्सा प्रहरीले गत साउन १३ गते अन्दाजी १६/१७ वर्षको युवतीको विभत्सव अवस्थामा शव फेला पारेको थियो । जगरनाथपुर गाउँपालिकाको सुपौलिया पुल नजिकै इमृतिया खोला किनारमा शरीर र टाउको छुट्टा छुट्टै गरी ५० मिटरको दुरीमा फालिएको अवस्थामा फेला परेको शवबारे साढे ५ महिना लामो अनुसन्धानपछि हत्यामा बुबा आफ्नै बुवाको संलग्नता रहेको रहस्या खुलेको हो । हत्या गर्ने बुवा महतोलाई बारा प्रहरीले पक्राउ गरि अनुसन्धान कार्य जारी राखेको छ ।
महतोले खेताला खोजेर आफ्नै माईली छोरी कोशिला कुमारीको हत्या गरेको जिल्ला प्रहरी कार्यालय बाराका प्रहरी नायब उपरीक्षक दधिराम न्यौपानेले जानकारी दिए । उनका अनुसार तल्लो जातको युवकसँग प्रेममा रहेको कुरा गाउँँभरी हल्ला भएपछि २ जना सहयोगी खोजेर छोरीको हत्या गरि शरीर र टाउको छुट्याएर खोलामा फाल्न लगाएको महतोको बयानबाट खुलेको बताए । प्रेमको कुरा गाउँभरि हल्ला भएपछि गाडीमा राखेर आफैँसमेत मिलेर हत्या गरेको र शवको शरीर र टाउको छुट्याएर इमृतिया खोला किनारमा फालेको पक्राउ परेका महतोले स्वीकारेको डिएसपी न्यौपानेले जानकारी दिए ।
शंकास्पद बयानले खुल्यो छोरी हत्याको पोल
पर्सा प्रहरीले कोशिला कुमारीको शव साउन १३ गते बरामद गरेको थियो, तर दोषीको कुरा छाडौं शव पनि पहिचान गर्न सकेको थिएन । छेउछाउँदेखि सीमावर्ती भारतीय सहरसम्म पनि शव कसको हो भन्नेबारे पत्ता लगाउन प्रहरी लागि परेको थियो । पर्सा प्रहरीले दुई महिनासम्म पनि शवबारे केही सुराकी पाएन् । त्यो पर्सा प्रहरीको लागि टाउको दुखाई पनि बनेको थियो । हत्या भएको दुई महिनासम्म शवको पहिचान हुन नसक्नु प्रहरीको लागि पनि चुनौति नै थियो । प्रहरीले शवको थप पहिचानका लागि काठमाडौँको टिचिङ अस्पताल पठाएको थियो ।
घटना पर्साको भएपनि सिमावर्ती जिल्ला बारा र पर्सा प्रहरीले शंका लागेको विभिन्न गाऊँ चोकमा दर्जनौँ व्यक्तिसँग शवको बारेमा शोधखोज गरेको थियो । तर शव फेला परेको ६ महिनापछि बारा प्रहरीले फेटा गाऊँपालिकाको त्रिवेणी टोलमा बस्ने हरिन्द्र महतोका छोरी कोहिसँग फरार रहेको भन्दै गाईँगुईँ सूचना पायो । उक्त सूचनालाई पछ्याउँदै जाँदा बाबु हरिन्द्र महतोसँग सोधपुछ गर्दा छोरी भागेको हुनसक्ने बयान थिए । घरबाट भागेर बिहे गरेको तर ६ महिनासम्म कुराकानी नभएको भन्ने सूचनापछि प्रहरीले बाबुको बयानमै शंका गर्यो । अनुसन्धानमा कोशिला कुमारीको चिनजान भएकाहरुसँग बुझ्दा भागेको भन्दा पनि बेपत्ता पारिएको सूचना प्रहरीले पाए ।
त्यो सूचना र यता बारा प्रहरीले टाउको र शरीर फालिएको भनिएको शवसँग तुलना गर्दा उमेर उस्तै उस्तै भएको तथ्य फेला पार्यो । त्यसपछि प्रहरीले १ सय ५९ औँ दिनमा छोरीको फोटो र हत्यागरी फालिएको शवको फोटो तुलना गर्दा एउटै रहेको फेला पारे । त्यसपछि थप अनुसन्धान गर्दै जाँदा महतोले छोरीलाई आफू सहित २ जना सहयोगी लगाएर हत्या गरेको स्वीकारे । हत्या गर्ने महतो अहिले बारा प्रहरीको हिरासतमा छन् । छोरीको हत्या लुकाउन महतोले छोरी भागेर बिहे गरेको हुनसक्ने भन्दै उनलाई परिवारले अस्वीकार गरेकोले खोजी नगर्ने बताउने गरेका थिए । तर प्रहरीको कडा अनुसन्धानबाट बुवाले छोरीको हत्या गरेको पोल खुल्यो । प्रहरीले थप २ जना सहयोगीको खोजतलास गरि रहेको बताइएको छ ।
प्रेम सम्बन्धको कारण हत्या
दैनिक ज्यालादारी र आफ्नै थोरै जमिनमा खेतीपाती गरेर जीविकोपार्जन गर्ने हरिन्द्र महतोको २ छोरीसहित, एक छोरा र श्रीमतीसहितको ५ जनाको परिवार थियो । परिवार पाल्न दैनिक श्रम गर्ने हरिन्द्रले कमजोर आर्थिक अवस्थाका कारण माइली छोरी कोशिला कुमारीलाई मामा घरमा राखेर पढाएका थिए । महतो हाट बजारमा तरकारी बेच्न जाँदा छोरीले बैठासँग प्रेम सम्बन्ध राखेको हल्ला सुनेका थिए । छोरीले तल्लो जातको युवकसँग लागेको गाउँटोलमा हल्ला गरेपछि आफूलाई एकदमै चित्त दुःखेको र ति युवकसँग नलाग्न पटक-पटक छोरीलाई भन्दा पनि नमानेपछि हत्याको योजना बनाएको महतोले स्वीकारेको प्रहरीको भनाई छ ।
गाउँटोलमा छोरीको प्रेम सम्बन्धबारे ब्यापक हल्ला चल्न थालेपछि बाध्य भएर साउन ११ गते २ जना सहयोगीसँग मिलेर छोरीलाई गाडीमा लगेर गाडीमै हत्या गरी हत्यालाई लुकाउन जिल्ला पार गरि पर्साको जगरनाथपुर गाउँपालिकाको सुपौलिया पुल नजिकै इमृतिया खोला किनारमा शरीर र टाउको छुट्टा छुट्टै गरी ५० मिटरको दुरीमा फालेको महतोले स्वीकारेको डिएसपीको न्यौपानेले बताए । 
प्रतिक्रिया दिनुहोस् !