वीरगंज (पर्सा), १५ माघ । प्रधानमन्त्री पुष्पकमल दाहाल (प्रचण्ड) ले अर्को वर्षदेखि नीति तथा बजेट निर्माणको सन्दर्भमा आमुल परिवर्तन ‘रेडिकल रिफर्म’ ल्याउने तयारी गरेको बताए । २० औं स्थापना दिवसको अवसरमा प्रेस सेन्टर नेपाल केन्द्रिय समितिले वीरगंजमा आयोजनाको कार्यक्रमलाई सम्बोधन गर्दै प्रधानमन्त्री प्रचण्डले अर्को वर्षदेखि बजेट तथा नीति निर्माण प्रक्रियामा ठूलो क्रान्ति ल्याउने ल्याउन लागेको बताएका हुन् ।
उनले अब मेरो ध्यान यो पटक नीति तथा कार्यक्रम तथा बजेटतर्फ केन्द्रित रहने र अब जनताको सहभागिता गराएर बजेट बनाउने तयारी गरेको बताए । जनताबाट आएको सुझावहरुलाई नीति तथा कार्यक्रममा समेटिने उनको भनाई छ । गत सालको नीति तथा कार्यक्रम र बजेट जनताको पक्षमा नभएको भन्दै अब अर्को वर्षदेखि नीति तथा कार्यक्रमको सवालमा जनतामा पहिला बहस चलाउने बताए । बजेट ल्याउने प्रकृति र प्रक्रियाबाट बदलेर जनताको पक्षमा आमुल परिवर्तन ल्याउने तयारीमा रहेको उनको भनाई छ ।
बजेट निर्माणको सवालमा पनि यही प्रक्रिया अपनाइने बताए । बजेटको सवालमा पनि नीति तथा कार्यक्रम जस्तै प्रक्रिया अपनाएर सबैको राय सल्लाह लिएर लोकतान्त्रिक बजेट बनाइने दाबी गरे । ३ करोड भन्दामाथिको बजेट संघले हेर्ने र त्यसभन्दा कमका बजेट प्रदेश र स्थानीयलाई दिइने तयारी पनि गरिएको प्रचण्डको भनाई थियो । यसको साथसाथै पुराना योजना प्राथमिकतामा राखेर पूरा गर्नेतर्फ पहिलो जोड हुने र जनतालाई प्रत्यक्ष फाइदा हुने गरी बजेट निर्माण गर्ने योजना रहेको उनको भनाई थियो ।
उनले सिलिङ तोक्ने सवालमा पनि सबै मन्त्रालयहरुको सल्लाह अनुसार तोक्ने सरकारले आफ्नो ध्यान केन्द्रित गरेको भन्दै प्रधानमन्त्री प्रचण्डले देशमा रुग्ण भएर बसेका उद्योगहरुलाई सञ्चालन गर्ने सवालमा पनि केही ठोस निणर्य भएकोले केही सातामा जनताको यसको परिणाम देख्न सक्ने बताए । साथै प्रधानमन्त्री प्रचण्डले सामाजिक सञ्जालले नकारात्मक प्रभाव जमाइरहेको उल्लेख गरेका छन् । उनले पछिल्लो समय सामाजिक सञ्जाल स्थिरता र शान्ति विरोधी कामका लागि प्रयोग भइरहेको टिप्पणी समेत गरे ।
उनले सामाजिक सञ्जालका नकारात्मक गतिविधिलाई प्रतिवाद गर्न जरुरी रहेको बताए । उनका अनुसार हामीबाट त्यस्ता तत्वको प्रतिवाद हुन सकेको अवस्था नरहेको भन्दै यसका लागि नयाँ प्रविधि सहित प्रेस सेन्टर लाग्नुपर्ने बताए । अहिले आइटीको जमाना भएकोले त्यसको विशेषता बुझेर त्यसमा अभ्यस्त हुन समेत प्रेस संगठनसँग आबद्ध पत्रकारहरूलाई आग्रह गरे । 
प्रतिक्रिया दिनुहोस् !