वीरगंज (पर्सा), १० माघ । विगत केही वर्षअघिसम्म भारतीय नूनको उपभोग गर्दै आएका पर्साको भारतीय सीमावर्ती क्षेत्रका स्थानीयवासी आयोडिनयुक्त नूनप्रति आकर्षित हुन थालेका छन् । आयोडिनयुक्त नूनको महत्व र फाइदाबारे जनचेतना फैलाउनुकासाथै यसको प्रचारप्रसार, स्थानीय प्रशासनले भारतीय नूनको आयातमा कडाइ र सहज आपूर्तिसँगै सीमावर्ती क्षेत्रका स्थानीयवासीमा दुई बालबालिकाको चिन्ह भएको आयोडिनयुक्त नूनप्रति आकर्षण बढ्ेको हो ।
‘आयोडिनयुक्त नूनको फाइदाबारे बुझेपछि भारतीय ढिके नून खान छाडेका छौँ’, छिपहरमाई गाउँपालिकाका जमालुदिन मियाँले भने ‘यसअघि आयोडिन नूनको फाइदाबारे थाहै थिएन् ।’ साल्टट्रेडिङले गाउँमा आयोडिनयुक्त नूनको फाइदा र महत्वको विषयमा समय समयमा प्रचारप्रसार गरेपछि यस नूनप्रति आकर्षण बढेको उनको भनाइ थियो । आयोडिनयुक्त नून खाँदा मानसिक तथा शारीरिक फुर्तिलो, स्वस्थ्य हुनुका साथै स्मरण शक्तिको वृद्धि हुने सिरहाको ठोरी-४ का शम्भु श्रेष्ठले बताए । उनले भने ‘करिब तीन/चार वर्षअघिसम्म गाउँका प्रायः स्थानीयवासीले भारतीय ढिके नून खान्थे । अहिले अधिकांशले आयो नूनको प्रयोग गर्न थालिसकेका छन् ।’
आयो नूनभन्दा सस्तो र खरिद गर्न पनि सहज हुँदा ढिके नून प्रयोग बढे्को भन्दै अहिले गाउँमै आयो नून पाउन थालेपछि यहीँ उपभोग गर्ने गरिएको श्रेष्ठले बताए । स्थानीय प्रहरी प्रशासनले भारतीय नून आयातमा कडाइ गरेपछि ढिके नून बन्द भएको उनको भनाइ थियो । आयोडिनयुक्त नून बजारमा २० रुपैयाँमा बिक्री भइरहेको छ भने भारतीय नूनप्रति प्याकेट १० रुपैयाँ (भारू) मा बिक्री भइरहेको छ । ‘भारतीय सीमासँग जोडिएका पर्साको वीरगंज महानगरपालिका, छिपहरमाई गाउँपालिका, ठोरी, पटेर्वासुगौली लगायतका स्थानमा ढिके नूनको प्रयोग बढी भइरहेको थियो’, साल्टट्रेडिङ कर्पोरेशन वीरगंजका प्रमुख अमोज लामिछानेले भने ‘आयोडिन नूनको महत्व र फइदाका बारेमा प्रचारप्रसार गरेपछि अहिले भारतीय नूनको प्रयोगमा करिब ९० प्रतिशत कमी आएको छ ।’
स्थानीयवासीको आयो नूनप्रति आकर्षण बढ्ेसँगै पर्सा, बारा लगायतका जिल्लामा आयोडिनयुक्त नूनको माग बढ्ेको प्रमुख लामिछाने जानकारी दिए । उनका अनुसार पाँच वर्षअघिसम्म पर्सा, बारा, रौटहट र सर्लाहीमा गरी मासिक करिब १०/१२ हजार बोरा आयो नून खपत हुँदै आएकामा पछिल्लो केही वर्षदेखि मासिक बीस हजार बोरा खपत हुन थालेको छ । अघिल्लो आर्थिक वर्ष २०७९/०८० मा दुई ४० हजार बोरा आयो नून खपत भएको प्रमुख लामिछानेको भनाइ थियो । साल्टट्रेडिङ कार्पोरेसन वीरगंजले पर्साका ११, बाराका नौ, रौतहटका पाँच र सर्लाहीका सात गरी ३२ वटा डिलरमार्फत नून बिक्री गर्दै आएको छ ।
प्रतिक्रिया दिनुहोस् !