वीरगंज (पर्सा), २९ पुस । वीरगंजका उद्योगी व्यवसायीले सीमावर्ती क्षेत्रका विविध समस्याका बारेमा भारतीय प्रशासनसँग छलफल गरेका छन् । भारत विहारको पूर्वी चम्पारण रक्सौलकी एस.डी.ओ. शिवाक्षी दिक्षितसँग सीमा क्षेत्रका समस्याका सम्बन्धमा वीरगंजका व्यवसायीले छलफल गरेका हुन् ।
वीरगंज उद्योग वाणिज्य संघका अध्यक्ष अनिल कुमार अग्रवाल नेतृत्वको टोलीले अवैध व्यापार, नाकाको सुरक्षा व्यवस्था, ट्राफिक जाम लगायतका बारेमा दिक्षितसँग छलफल गरेको हो । ट्राफिक अवस्था, सर्वसाधारण नागरिकलाई आवतजावतका क्रममा भोग्नुपरेको त्रासदी, रेलको समय लगायतका समस्याका बारेमा अवगत गराइएको उद्योग वाणिज्य संघका अध्यक्ष अग्रवालले बताए ।
त्यस्तै खुला नाकालाई सदुपयोग र व्यवस्थित गर्दै ह्याप्पी बोर्डरको अवधारणालाई अघि बढाउन संघका निवर्तमान अध्यक्ष डा. सुवोध कुमार गुप्ताले धारणा राखे । नेपाल उद्योग वाणिज्य महासंघका केन्द्रीय सदस्यसमेत रहेका डा. गुप्ताले सीमावर्ती क्षेत्रका प्रशासन, सुरक्षा निकाय र उद्योगी व्यवसायी बीचको भेटघाटलाई निरन्तरता दिनुपर्ने आवश्यक्ता औल्याए ।
वीरगंजका व्यवसायीले राखेका समस्या र मुद्दाका बारेमा रक्सौलकी एस.डी.ओ. दिक्षितले सकारात्मक प्रतिक्रिया दिइन् । उनले दुवै देशको सीमा क्षेत्रका नागरिकले समस्या भोगीरहेको हुँदा त्यसको समाधानमा प्रशासन जुटिरहेको पनि उनले जानकारी गराइन् । सो अवसरमा वीरगञ्ज उद्योग वाणिज्य संघका अध्यक्ष अग्रवालसँगै, निवर्तमान अध्यक्ष एवम् नेपाल उद्योग वाणिज्य महासंघका केन्द्रीय सदस्य डा. सुवोध कुमार गुप्ता, संघका उपाध्यक्ष माधव राजपालको उपस्थिति रहेको थियो । 
प्रतिक्रिया दिनुहोस् !