कलैया (बारा), २६ पुस । जिल्ला प्रहरी कार्यालय बाराको अपराध अनुसन्धान शाखामा कार्यरत बरिष्ठ हवल्दार अजय पटेल आफ्नो काम कर्तव्य भन्दा पनि तस्करसँग सेटिङ्ग गरि रकम असुल्नमा तल्लिन भएका छन् । बाराका प्रहरी उपरीक्षक सुरेश काफ्लेको विश्वासिलो पात्रको रुपमा चिनिने बरिष्ठ हवल्दार पटेल अहिले नेपाल भारतको सीमा क्षेत्रमा पर्ने बारा जिल्लाका नाकाहरुबाट तस्करसँग सेटिङ्ग गराउने काममा व्यस्त छन् । अपराध रोकथामको लागि खटाइएका पटेल अहिले अपराध रोकथाम भन्दा पनि तस्करसँग सेटिङ्ग गराई हाकिमलाई खुशी पार्न तस्करी गराउने कार्यमा लागेका हुन् ।
तस्करीबाट सबैभन्दा बढि पैसा उठाएर हाकिमलाई दिने उनले ठेक्का नै पाएको बताइएको छ । उनको तस्करहरुसँग राम्रो हिमचिम रहेको कारण पनि उनले यो ठेक्का पाएको प्रहरीमा चर्चा छ । नेपाल भारत सीमा क्षेत्रमा पर्ने प्रहरी चौकीका इन्चार्जलाई आफ्नो दबदबाको रवाफ देखाउँदै आफै तस्करीको सेटिङ्ग गर्ने गरेको बताइएको छ । पटेल बरिष्ठ हवल्दार भएपनि उनको रवाफ कम छैन । उनी चाहे मात्रै असई, सई, बरिष्ठ सईहरुले चौकीको इन्चार्ज पाउने गरेका छन् । एसपीको विश्वासिलो पात्र भएकै कारण उनकै इसारामा प्रहरी चौकीका इन्चार्जहरु फेरबदल हुने गरेको प्रहरी श्रोतले जनाएको छ । दर्जाले तल्लो भएपनि उनको रवाफ उपल्लो हाकिम भन्दा कम छैन ।
उनी करिब दुई वर्षदेखि जिल्ला प्रहरी कार्यालय बारामा कार्यरत छन् । विगतमा पर्सामा काम गरिसकेको कारण उनको तस्करहरुसँग राम्रो पकड रहेको छ । एसपीको अत्यन्तै विश्वासिलो पात्र भनेर चिनिने पटेलले प्राय चौकीका इन्चार्ज हेरफेरदेखि तस्करहरुसँग उठन्ती गर्न माहिर मानिन्छन् । आफ्नो उपल्लो हाकिमलाई पाखा लगाउँदै एसपीको विश्वासिलो पात्रको रवाफ देखाएर तस्करी गराउने गरेकै कारण उनी पटक पटक विवादमा पर्दै आएका छन् ।
जिल्ला प्रहरी कार्यालय बारामा आउनु अघि उनी विवादमा परि पर्साबाट मधेश प्रदेश प्रहरी कार्यालय जनकपुर तानिएका थिए । त्यहाँबाट उनी प्रहरी प्रधान कार्यालय तानिए । प्रहरी प्रधान कार्यालयमा केही दिनको कार्यभारपछि उनी मकवानपुरमा दरबन्दी भएर आए अनि केही दिनमै पुनः जिल्ला प्रहरी कार्यालय बारामा दरबन्दी गराउन सफल भए । त्यस पश्चात उनी अपराध अनुसन्धान शाखामा कार्यरत रहेपनि अपराध रोक्ने काम भन्दा पनि तस्करी गराउने काम उनको प्राथमिकता हो ।
उनी चौकीका इन्चार्जहरुसँग मिलेर तस्करहरुसँग सेटिङ्ग गराउने काममा व्यस्त रहेको बताइएको छ । उनले अहिले बारा जिल्लाको बलिरामपुर नाकाबाट तस्करी गराई रहेको बताइएको छ । उनले तस्करहरुसँग महिनावारी सेटिङ्ग गरी तस्करीको लाईन खुलाएको श्रोतले जनाएको छ । तस्करहरुसँग सेटिङ्ग गरि बारा जिल्लाको विभिन्न नाकाबाट कपडा, काजु, हार्डवेयर, कफीको दाना, प्याज, माछा, धान लगायतको सामाग्रीहरुको गराई रहेको प्रहरी श्रोतले जनाएको छ ।
तस्करहरु दुलारचन, सन्तोष, अनहोती, लालु यादव, विरेन्द्र, राजु, टेडा, जयलाल, संजय तत्वाले कपडा, काजु, हार्डवेयरका सामान, प्याज, कफीको दाना एवं धानको तस्करी गरि रहेका छन् । तस्करीको लाइन खुलाए वापत एकजना तस्करसँग जिल्ला प्रहरीको नामले घुमुवा अजय पटेलले ४५ हजार रुपैयाँ एवं सशस्त्र प्रहरी बल बलिरामपुरका सईले मासिक २५ हजार रुपैयाँ एवं इलाका प्रहरी कार्यालय गण्डकका घुमुवाले मासिक १५ हजार रुपैयाँ बुझेको बताइएको छ ।
भारतबाट तस्करीको सामान नेपाल भित्र्याउन बलिरामपुर नाका अहिले सजिलो भएको र त्यस क्षेत्रमा पर्ने प्रहरी चौकी, सशस्त्र प्रहरी, जिल्ला प्रहरी कार्यालयका घुमुवा, इलाका प्रहरी कार्यालय गण्डकका हाकिम पनि तस्करीको लाइन दिएको कारण रातिको समयमा तस्करीको सामान नेपाल भित्रि रहेको बताइएको छ । तस्करहरुले कपडा एवं काजु रक्सौलबाट सहदेवा, बलिरामपुर, इनर्वागाउँ, भुटनदेवी हुँदै वीरगंज बजारसम्म सहजै रुपमा पुर्याउने गरेका छन् ।
कपडा तथा काजु तस्करीमा जिल्ला प्रहरी कार्यालय पर्सा मातहतमा रहेका प्रहरी चौकी इनर्वाका इन्चार्ज, वडा प्रहरी कार्यालय वीर्ताका घुमुवा, टाइगर टोली एवं मधेश प्रदेश प्रहरी कार्यालय जनकपुरका घुमुवाले पनि सघाउने गरेका छन् । यसैगरि धान, प्याज एवं कफीको दाना रक्सौलबाट सिर्सिया, महदेवा, फुदियाटोला, मुसहर्वा हुँदै बारा एवं पर्साको विभिन्न ठाउँमा तस्करीको सामान पुर्याउने गरिएको हो । 
प्रतिक्रिया दिनुहोस् !