वीरगंज (पर्सा), १९ पुस । वीरगंज पानीटंकी स्थित आशाराम अस्पतालमा कार्यरत डा. आलोक दासविरुद्ध जिल्ला प्रशासन कार्यालय पर्सामा उजुरी परेको छ । वीरगंज महानगरपालिका – ३२ बन्दननगर बस्ने भोला कुमार साहले डा. दास विरुद्ध जिल्ला प्रशासन कार्यालयमा उजुरी दिएका हुन् । भोलाले बिहीबार पत्रकार सम्मेलन गरि डा. दासले उपचारमा लापरबाही गरेको कारण आफ्नो हात काट्नु परेको बताउँदै उनीमाथि कारवाहीको माग गर्दै उजुरी गरेको बताएका छन् ।
उनका अनुसार २०८० कात्तिक १२ गतेमा सीमावर्ती शहर रक्सौलबाट टेम्पो चढि फर्किँदै गरेको अवस्थामा दुर्घटनामा परेका थिए । दुर्घटनामा भोलाको बायाँ हात भाँच्चिएपछि टेम्पोवालालाई नियन्त्रणमा लिई उपचार गराउन दबाब दिइयो । चालकले रक्सौलको लक्ष्मीपुरस्थित एसआरपी मेमोरियल ट्रस्ट सुपर स्पेसियालिटी हस्पिटलमा उपचार गराउन लगे । त्यहाँ डा. दासको सुझाव अनुसार उनको हातको शल्यक्रिया गरेर स्टिल राखिएको थियो । ‘शल्यक्रिया सफल भएको भन्दै चिकित्सकहरूले मलाई एक साता पश्चात कात्तिक १९ गते डिस्चार्ज गरेका थिए । ‘त्यस पूर्व डा. दासले मेरी आमालाई भेटेर ड्रेसिङका लागि रक्सौल नआई वीरगंजमै आफू कार्यरत आशाराम अस्पताल आउन सुझाव दिएका थिए,’ भोलाले पत्रकार सम्मेलनमा भने ।
डा. दासकै सुझाव अनुसार आफू पहिलो पटक कात्तिक २१ गते ड्रेसिङका लागि आशाराम अस्पताल पुगेको भोलाले बताए । ‘पहिलो दिन ड्रेसिङ गर्ने क्रममा डा. दासले घाउ ठीक भइरहेको बताउँदै दुई दिनपछि हामीलाई फेरी बोलाएका थिए,’ उनले भने । यद्यपी कात्तिक २३ उनी आशाराम पुग्दा डा. दासले आफूसँग ड्रेसिङ सम्भव नहुने बताउँदै शल्यक्रिया गरिएको एसआरपी अस्पतालमै जान सुझाव दिए । त्यहाँ पुग्दा डा. अलिन्द्र किशोर नामक चिकित्सकले हातमा ठूलै समस्या भएको बताउँदै काट्नुपर्ने बताएको साहले पत्रकार सम्मेलनमा जानकारी दिए । ‘डा. आलोकले हामीलाई शल्यक्रिया भएकै अस्पतालमा जान भनेपछि नै मलाई शङ्का लागेको थियो,’ भोलाले भने, ‘हामी एसआरपी पुग्दा सुरुमा डा. अलिन्द्र किशोरसँग भेट भएन । खोज्दै मोतीहारी पुगेपछि उनले हातको शल्यक्रियामा समस्या भएको कारण काट्नु पर्ने बताए ।’
त्यसपछि स्थानीयको सुझाव अनुसार थप उपचारका लागि आफू काठमाडौँस्थित बिनएण्डबी हस्पिटलमा पुगेको भोलाले बताए । उनले भने, ‘काठमाडौँ चेकजाँच गराउँदा शल्यक्रियामा लापरबाहीको कारण मेरो भाँच्चिएको हात काट्नुपर्ने अवस्था आएको जवाफ पाए । यसरी उपचारमा लापरबाही गरेर हात काट्ने बनाउने डाक्टरलाई कारबाही गरी मलाई क्षतिपूर्ति दिलाउन आग्रह गर्दछु ।’ डा. आलोकले भने आफूमाथि लगाइएका सबै आरोप निराधार रहेको प्रतिक्रिया दिए । टेलिफोन संवादका क्रममा उनले सिनियर डाक्टरको निर्देशनलाई आफूले पालना मात्र गरेको बताए ।
उनले भने, ‘म एसआरपी अस्पतालमा २ घण्टाका लागि मात्रै जाने गर्दछु । त्यही समयमा उहाँको शल्यक्रिया मोतिहारीका चिकित्सकले गर्नुभएको थियो, मैले उहाँले भने बमोजिमको काम मात्रै गरेको छु । यसमा मेरो कुनै गल्ती छैन ।’ भोलालाई ड्रेसिङका लागि आफूले आशाराम अस्पतालमा आउन आग्रह समेत नगरेको डा. आलोकको दाबी छ । आफै पत्ता लगाएर आशाराम हस्पिटलमा आएपछि आफूलाई अस्पतालबाट खबर पाएको उनले बताए । यस विषयमा बुझ्न रक्सौलको एसआरपी अस्पतालमा सम्पर्क गर्न खोज्दा त्यहाँका प्रतिनिधिले फोनमा सबै कुरा बताउन नमिल्ने प्रतिक्रिया दिए । साथै अस्पतालमै आएर कुरा गर्न आग्रह गर्दै उनले फोन नै काटे । 
प्रतिक्रिया दिनुहोस् !