टेरामक्स लागू भयाे भने राष्ट्र प्रमुख र विपक्षी दल नेताकाे पनि फाेनकाे गाेपनियता रहँदैन : प्रदिप यादव

वीरगंज (पर्सा), १२ पुस । जसपा सांसद प्रदिप यादवले टेरामक्स प्रविधिकाे खरिद प्रक्रिया बन्द गर्न माग गरेका छन् । राष्ट्रिय तथा अन्तर्राष्ट्रिय फोन कल एवं म्यासेजको निगरानी र त्यसको गुणस्तर मापन गर्न भनेर नेपाल दुरसंचार प्राधिकरणले `टेलिकम्युनिकेसन ट्राफिक मनिटरिङ एन्ड फ्रड कन्ट्रोल सिस्टम´ टेरामक्स प्रविधि खरिद प्रक्रिया अगाडि बढाइरहेका बेला सांसद यादवले बन्द गर्न माग गरेका हुन् ।

लेखा समितिकाे बुधबार बसेकाे बैठकमा सांसद यादवले कानुन नबनाई टेरामक्स प्रविधि खरिद तथा लागू गर्न नमिल्ने जिकिर गरे । यसले गाेपनियताकाे हक हनन हुने र उच्च पदस्थलगायत सबैकाे कल रेकर्ड दुरूपयाेग हुने खतरा ओल्याए । `कानुन नबन्दै आफूखुसी व्याख्या गरि टेरामक्समा दुरसचारले जे गरेकाे छ, कानुन विपरीत छ । सर्वाेच्चकाे परमादेश विपरित छ । कानुन नबनाई टेरामक्स किन अगाडि बढाइयाे ?´ उनले साेधे ।

नियामक निकायबाट अहिले पनि अनुमतिबिना कल डिटेल निस्किरहेकाे भन्दै उनले भने, `कानुनले अदालतकाे अनुमतिमा लेउ भन्छ । तर, आफूखुसी निकालिएकाे छ । नम्बर मेटाएर रेकर्ड निकालिरहेका छन् ।´ यस्ताे अवस्थामा टेरामक्स लागू भयाे भने राष्ट्र प्रमुख, विपक्षी दलकाे नेता कसैकाे पनि गाेपनियता बाँकी नरहने भन्दै उनले टेलिकम र एनसेलका कर्मचारीले फाेन रेकर्ड गरेर दुरुपयोग गर्ने चिन्ता व्यक्त गरे । `त्यसै त अहिले पनि अनुमति नलिइ थाहा नदिएर रेकर्ड गरिरहेकाे छ । त्यसैले यसलाई तुरून्त राेक्नुपर्छ,´ उनले भने ।

टेरामक्सका नाममा दुरसंचारलाई खुफिया एजेन्सीजस्ताे बनाउन खाेजिएकाे भन्दै यादवले थपे, `कि खुफिया एजेन्सी भनेर जिम्मा दिनुपर्याे हाेइन भने याे टेरामक्स प्रक्रिया बन्द गर्नुपर्याे ।´

लेखा समितिलाई पंगु नबनाइयाेस्
सांसद यादवले अन्य समितिबाट कार्यक्षेत्र मिचेर लेखा समितिलाई पंगु बनाउन खाेजिएकाे टिप्पणी गरे । लेखाले उठाएकाे एनसेल शेयर खरिद प्रकरणलाई सुशासनकाे नाममा राज्य व्यवस्था समितिले बीचमै हाइज्याक गर्नु आपत्तिजनक भन्दै उनले यसलाई गम्भीरतापूर्वक लिएर सभामुखसँग कुरा राख्नुपर्ने बताए ।

`लेखा समितिलाई अरूले पंगु बनाउने काेसिस गरिरहेकाे छ । हामी सदस्यहरूसहित सभापति सभामुखकाेमा गएर  ध्यानाकर्षण गराउनुपर्छ । कहिले सुशासनकाे नाममा त कहिले के नाममा कार्यक्षेत्र मिच्ने काम भइरहेकाे छ । याे हुन दिनुहुँदैन,´ उनले भने, `लेखा समितिकाे आफ्नाे सशक्त उपस्थिति हुनुपर्छ । कुनै विषय हामीले सुरू गर्ने अर्काेले हस्तक्षेप गर्ने कुरा स्विकार्य छैन ।´