वीरगंज (पर्सा), १ मंसिर । पर्सा प्रहरीले नक्कली नोटसहित वीरगंजबाट दुई जनालाई नियन्त्रणमा लिएको छ । पक्राउ पर्नेमा वीरगंज महानगरपालिका ३१ कोनिया निवासी २४ वर्षीय ऋषिलाल पटेल र बाराको कलैया उपमहानगरपालिका ३ निवासी २५ वर्षीय उमेश कुमार रहेका छन् । प्रहरीले दुबै जनालाई कार्तिक २४ गते नै पक्राउ गरेपनि एक सत्ता पछि मात्र मंसिर १ गते सार्वजनिक गरेकाे हाे ।
नक्कली नोट प्रयोग गरेर किनमेल गरिरहेको अवस्थामा एक हजारकाे नक्कली नाेटसहित उनीहरुलाई नियन्त्रणमा लिइएकाे प्रहरीले जनाएकाे छ । उनीहरूको साथबाट ३८ वटा एक हजार दरको गरी कूल ३८ हजार रुपैयाँको नक्कली नोट बरामद गरिएको जिल्ला प्रहरी कार्यालय पर्साले जनाएकाे छ ।
वीरगंज ८ स्थित सिटी मार्केटमा नक्कली नाेटबाट कपडा खरिद गर्न खोजीरहेको दुबै जनालाई पक्राउ गरिएकाे पर्सा प्रहरीका प्रवक्ता एवम् प्रहरी नायव उपरीक्षक (डिएसपी) कुमार विक्रम थापाले वताए । ऋषिलाल र उमेशले गत कार्तिक २४ गते शुक्रवारका दिन साँझ ८ बजेको समयमा सिटी मार्केटस्थित एक पसलबाट नक्कली नोट प्रयोग गरेर कपडा खरिद गर्न खोजेको डिएसपी थापाले बताए । सोही क्रममा पसलेले नक्कली नोट पहिचान गरी प्रहरीलाई खबर गरेका थिए ।
नक्कली नोटको विषयमा खबर पाउन साथ घटनास्थलमा पुगेको प्रहरी टोलीले ऋषिलाल र उमेशलाई कानुनी रीत पुर्याई खानतलासी गर्दा उनीहरूको साथबाट एक हजार दरको ३८ थान गरी ३८ हजार रुपैयाँको नक्कली नोट बरामद भएको डिएसपी थापाले जानकारी दिए । ऋषिलाल र उमेश हाल प्रहरी नियन्त्रणमा छन् र उनीहरूविरुद्ध खोटा चलन सम्बन्धी कसुरमा थप अनुसन्धान कार्य भइरहेको थापाको भनाई छ । 
प्रतिक्रिया दिनुहोस् !