कलैया (बारा), २९ असोज । बाराको सुवर्ण गाउँपालिकाका जनप्रतिनिधिहरुले प्रमुख प्रशासकीय अधिकृत वकिल पाललाई उनकै कार्यकक्षमा घेराउ गरेका छन् । सुवर्ण गाउँपालिका उपाध्यक्ष पुनम कुमारीको अगुवाईमा पाँचजना वडाअध्यक्ष र तीनजना कार्यपालिका सदस्यहरुले प्रमुख प्रशासकीय अधिकृत पालकै कार्यकक्षमा करिब चार घण्टा सम्म घेराउ गरेका हुन् ।
आव २०८०/०८१ को गाउँसभाबाट पारित भएको निणर्यको प्रमाणित प्रतिलिपी, रेडबुकको प्रमाणित प्रतिलिपी र बैठकबाट निणर्य भएको इन्धन खर्चको विवरण पटक पटक माग गर्दा प्रमुख प्रशासकीय अधिकृत पालले दिन नमानेपछि उनलाई घेराउ गरिएको हो । गाउँसभाबाट पारित भएका ति निणर्यहरुको प्रमाणित प्रतिलिपी नदिएपछि असोज २३ गते उपाध्यक्षकै नेतृत्वमा जिल्ला प्रशासन कार्यालयमा ज्ञापन पत्र समेत बुझाइएको थियो तर प्रशासन कार्यालयबाट केही चासो नदिएपछि सोमबार प्रमुख प्रशासकीय अधिकृत पाललाई उनकै कार्यकक्षमा घेराउ गरिएको बताइएको छ ।
अधिकृत पालले आफ्नो मनोमानी रुपमा कार्यालय संचालन गर्न खोज्दा जनप्रतिनिधिहरुले उनले गरेको कामको विवरण सहित कार्यपालिका बैठकबाट भएको निणर्य माग गरेको थियो । अधिकृत पाल जुन गाउँपालिकामा गएपनि विवादमा पर्दै आएका छन् । गाउँपालिकामा विवाद उत्पन्न भई अधिकृतलाई जनप्रतिनिधिहरुले उनकै कार्यकक्षमा घेराउ गरेपछि जिल्ला प्रहरी कार्यालय कलैयाबाट गएको प्रहरी टोलीले विवादलाई साम्य पारेको थियो भने विवादलाई टुङ्गोमा लगाउन प्रहरीले छलफल गराई रहेको बताइएको छ ।
अधिकृत पाल राजनीति संरक्षणमा पालिकामा खुलेयाम भ्रष्टाचारी गर्ने गरेको जनप्रतिनिधिहरुको गुनासो छ । जनप्रतिनिधिहरुलाई पाखा लगाई मनोमानी रुपमा पालिका संचालन गर्न खोजेपछि अधिकृत पाल जुन पालिकामा गएपनि विवादमा पर्ने गरेका छन् । यो भन्दा पहिला त्यही पालिकाबाट विवादमा परि अन्यत्र सरुवा भएका पाल पुनः त्यही पालिकामा सरुवा गराएर आएका हुन् । त्यो भन्दा अगाडि पनि बारागढी गाउँपालिकामा गएपछि विवाद उत्पन्न भएको थियो । त्यस पश्चात जबरजस्ती हाजिर भएपनि दुई हप्ता नवित्दै पुनः उनको अर्को पालिकामा सरुवा भएको थियो ।
विवादित अधिकृतको रुपमा चिनिने पाल कार्यदक्षतामा पनि फितलो छन् । पालिकाको प्रत्येक बजेटमा कमिशन लिएर मात्रै काम गर्नमा माहिर मानिएका अधिकृत पाल सधैं विवादमा पर्दै आएका छन् तर पनि कारवाही गर्ने निकाय नै संरक्षण गर्दै आएको छ । जसले गर्दा भ्रष्टाचार गर्नमा उनको मनोबल झन बढ्दै गएको छ । 
प्रतिक्रिया दिनुहोस् !