विराटनगर । चिकित्सक अर्थात् डाक्टर बिरामीका लागि भगवान समान हुन्छन् । जस्ले मृत्युबाट जोगाउ छ र नयाँ जीवन दिन्छन् । तर, पछिल्लो समय चिकित्सकहरु बिरामीको भगवान होइन नाफा कमाउने कालो व्यापारीका रुपमा प्रस्तुत भएका छन् । यो घटना हो, विराटनगरको । कोशी अस्पताल विराटनगरका पूर्वमेडिकल सुपरिटेन्डेन्ट डा. तपेश्वरलाल कर्णले अवैध सम्बन्धबाट जन्मिएका शिशुलाई बिक्री गरेको पाइएको छ । मंगलबार डा. कर्णलाई प्रहरीले पक्राउ गरेपछि सेतो कोटको आँडमा डाक्टरको कालो धन्दा सतहमा आएको हो ।
मोरङ प्रहरीले नवजात शिशु बेचेको घटनामा संलग्न आरोपमा एक जना डाक्टर सहित ६ जना नियन्त्रणमा लिएको छ । कोशी अस्पतालका पूर्वमेसु तथा स्त्री तथा प्रसूती रोग विशेषज्ञ डाक्टर तपेश्वर लाल कर्णले अविवाहित जोडीबाट विराटनगरस्थित ग्रिनक्रस हस्पिटलमा जन्म भएको नवजात शिशुलाई पाँच लाख लिएर बेचेको प्रहरीको अनुसन्धानबाट खुलेको हो । पक्राउ पर्नेहरुमा शिशु बेच्ने डा. कर्ण, शिशुका बुबा भोजपुरक हतुवा गढी गाँउपालिका ४ का गोविन्द राई, शिशु खरिद गर्ने दिलमाया राजवंशी र उनका छोरा सूर्यनारायण राजवंशी, दिदी सुधा राजवंशी र चिकत्सकका सहयोगी निर्मला यादवलाई प्रहरीले अनुसन्धानका लागि नियन्त्रणमा लिएको हो । मोरङ प्रहरीका प्रवक्ता डिएसपी रन्जनकुमार दाहालका अनुसार डा. कर्णले ग्रिनक्रस अस्पतालको ओटी विभागमा कार्यरत सुधामार्फत शिशुलाई बिक्री गरेको आरोप छ ।
असार १३ गते अविवाहित महिलाले ग्रिनक्रस हस्पिटलमा छोरीलाई जन्म दिएपछि नवजात शिशुलाई एनआइसियूमा राखेर उपचार गर्नुपर्ने अवस्था थियो । डाक्टर कर्णको योजनामा नवजात शिशु किनेपछि राजवंशी दम्पतीले विराट नर्सिङ होममा थपउपचारको लागि लगेका थिए । विराटमा उपचारको क्रममा दुई लाख रुपैयाँ खर्च भएको बताइएको छ । प्रहरीले उनलाई पक्राउ गरेपछि गत शुक्रवारदेखि विराटनगरस्थित कोशी अस्पतालमा भर्ना भएका डा. कर्ण मङ्गलवार दिउँसो डिस्चार्ज भएपछि प्रहरीले न्यायीक हिरासतमा राखेर अनुसन्धान गरिरहेको छ । प्रतिवादी राई अविवाहित किशोरीका प्रेमी हुन् । उनी समेतको मिलेमतोमा शिशु बिक्रीगरिएको अनुमान छ । जन्मदिएकोमा शिशु र प्रेमी बेपत्ता भएपछि युवती प्रहरीमा पुगेकी थिइन् ।
प्रतिक्रिया दिनुहोस् !