कोल्हवी (बारा), २७ फागुन / बाराको कोल्हवी नगरपालिका वडा नं. ५ का वडाध्यक्ष नन्दकिशोर चौधरी पक्राउ परेका छन् । वडाध्यक्ष चौधरीलाई डिभिजन वन कार्यालयको टोलीले पक्राउ गरेको हो ।
वन डिभिजन कार्यालय बाराका वन अधिकृत विनोद कुमार सिंहलाई दुर्व्यवहार गरेको आरोपमा वडाध्यक्ष चौधरी पक्राउ परेका हुन् । वन डिभिजन कार्यालयले अतिक्रमण हटाएर वृक्षारोपण गरेको जमीनको विषयमा छलफल गर्ने क्रममा वडाध्यक्ष चौधरीले वन अधिकृत विनोद कुमार सिंहलाई अपशब्द प्रयोग गरेका थिए ।
पक्राउ परेका वडाध्यक्ष चौधरी विरुद्ध वन ऐन २०७६ अन्तर्गत मुद्दा दर्ता गरिने भएको छ । डिभिजन वन कार्यालय बाराले उनी विरुद्ध वन ऐन अन्तर्गत मुद्दा चलाउने तयारी गरेको हो । उनलाई शनिबार प्रमुख वन अधिकृत विनोद कुमार सिंहलाई अभद्र व्यवहार गरेको आरोपमा पक्राउ गरिएको थियो ।
डिभिजन वन कार्यालय बाराले राष्ट्रिय वन क्षेत्रको अतिक्रमण हटाएर गरिएको वृक्षारोपण मास्ने कार्यमा वडा अध्यक्ष चौधरीको समेत संलग्नता देखिएको दावी गरेको छ । वन डिभिजन कार्यालयले अतिक्रमण हटाएर वृक्षारोपण गरेको जमिनको विषयमा छलफल भइरहँदा वडाध्यक्ष चौधरीले अपशब्द प्रयोग गरेका थिए ।
फागुन २३ गते उत्श्रृङ्खल प्रवृत्तिका केही व्यक्तिले कोल्हबी नगरपालिका वडा नं. ५ को ५.३९ हेक्टर जमिनमा लगाइएको ८ हजार ५ सय ५० वटा विरुवा काट्नुको र त्यसको संरक्षणका लागि गरिएको तारबार समेत भत्काएका थिए । त्यसको नेतृत्व वडा अध्यक्ष चौधरीले नै गरेको दावी वन कार्यालयको छ ।
घटनाको अनुसन्धानका लागि वन कार्यालयले अनुसन्धान अधिकृत तोकिसकेको छ । प्रारम्भिक अनुसन्धानको क्रममा वडा अध्यक्ष चौधरी समेतको संलग्नतामा विरुवा नष्ट गरिएकोले वनसम्बन्धी कसुरमा मुद्दा चलाइने प्रमुख वन अधिकृत सिंहले बताए । उनले वन फडानी गर्ने कार्यको नेतृत्व गरेको र तारबारको पोल पनि भत्काइएकोले ‘वन ऐन २०७६ अन्तर्गत वन सम्बन्धी कसुरमा मुद्दा चलाइने बताए ।
प्रतिक्रिया दिनुहोस् !