वीरगंज (पर्सा), ४ फागुन / नक्कली सुन देखाई ठगी गरेको आरोपमा पर्सा प्रहरीले चार जनालाई पक्राउ गरेको छ । पक्राउ पर्नेमा सर्लाही जिल्लाको बरहथवा नगरपालिका वडा नं. १० बस्ने ३१ वर्षीय रामवीर चौधरी, वडा नं. ६ बस्ने ४५ वर्षीय लालबाबु राय यादव, वडा नं. १८ बस्ने ३८ वर्षीय राकेश कुर्मी र वडा नं.१७ बस्ने वर्ष २७ वर्षीय अवधेश कुमार राय रहेका छन् ।
बिहीबार दिउँसो वीरगंज महानगरपालिका वडा नं. १५ हिमालयन होटल अगाडीबाट उनीहरुलाई पक्राउ गरिएको जिल्ला प्रहरी कार्यालय पर्साले जनाएको छ । उनीहरुले बी.आर. ३१ पी ०६४९ नम्बरको गाडीमा बसेर सर्वसाधारणलाई नक्कली सुन (बिस्कुट आकारको १ किलो लेखिएको धातु ) देखाई भ्रममा पारी ठगी गर्ने नियतले बिक्री गर्न लागेको अवस्थामा प्रहरीले पक्राउ गरेको पर्साका प्रहरी नायब उपरीक्षक दिपक गिरीले जानकारी दिए ।
उनका अनुसार प्रहरीले उनीहरुले प्रयोग गरेको भारतीय नम्बर प्लेट भएको गाडी र सुनको जलप भएको पहेँलो बिस्कुट आकारको धातु समेत बरामद गरेको छ । बरामद गरिएको सुन जस्तो देखिने धातुलाई वीरगंज सुनचाँदी व्यवसायी संघमा पठाएर परीक्षण गराउँदा सुनको जलप भएको धातु पुष्टि भएको जानकारी दिए । पक्राउ परेका चारैजना विरुद्ध ठगी सम्बन्धी कसूरमा सम्मानित जिल्ला अदालत पर्साबाट म्याद थप गराई अनुसन्धान भइरहेको जिल्ला प्रहरी कार्यालय पर्साले जनाएको छ ।
प्रतिक्रिया दिनुहोस् !