कार्यकक्षमै टिकटकमा मस्त नि. अधिकृत साह

मौलापुर (रौतहट), १९ साउन / मधेश प्रदेशको रौतहट जिल्लाको मौलापुर नगरपालिकाको निमित्त प्रमुख प्रशासकीय अधिकृत रामबाबु साहले आफ्नो कार्यकक्षमा नै चर्तिकला देखाएका छन् । उनले कार्यालयको मर्यादा र अनुशासनलाई मिचेर आफ्नो कार्यकक्षमै श्रीमतीलाई तिघ्रामा बसाई काखी च्यापी टिकटक बनाउदै गरेको भिडियो र फोटो अहिले सामाजिक सञ्जालमा भाइरल बनेको छ । कार्यकक्षभित्रै कुर्सीमा टिकटक बनाउँदा उनको चौतर्फि आलोचना हुन थालेको छ ।
नगरपालिका कार्यालयको प्रतिष्ठा र मर्यादालाई बिर्सिएर अधिकृत साह र उहाँकी श्रीमती रानी साहले कार्यालय भित्र टिकटकमा मस्त भएको देखिएको छ । मौलापुर नगरपालिकाको निमित्त प्रमुख प्रशासकीय अधिकृत साहले आफ्नो श्रीमतीसँग आफ्नै कार्यकक्षमा टिकटक बनाउदै गरेको फोटो सार्वजनिक भएपछि जनस्तरमा आलोचना भइरहेको छ । केही दिन अगाडि अधिकृत साहकी श्रीमती रानी साहले उहाँको पदीय कुर्सीमा साहको काखमा बसी टिकटक भिडियो बनाएर सार्वजनिक गरेको देखिन्छ । नगरपालिकाको प्रतिष्ठा र आफ्नो मान मर्यादालाई खिल्ली उडाउँदै नि. प्रमुख प्रशासकीय अधिकृत साहले आफ्नो पदीय कुर्सीमा बसी श्रीमतीलाई तिघ्रामा बसाई काखी च्यापी टिकटकमा मस्त बन्न थालेको फोटो र भिडियोमा देख्न सकिन्छ ।
साह करिब डेढ बर्ष देखि सो पदमा कार्यरत भएकाले उनले नगरपालिकालाई आफ्नो घर बुझी आफ्नो पदीय गरिमालाई समेत धज्जी उडाएको यस फोटोले बुझिन्छ । केही दिन अगाडि उनकी श्रीमतीले पदीय कुर्सीमा बनाएको टिकटक भिडियोबाट सो फोटो बाहिर आएको छ तर हाल यो भिडियो उनको श्रीमतीकी प्रोफाइलबाट डिलिट गरिएको छ । पछिल्लो लामो समय देखि नेपालका सरकारी कार्यालयको कर्मचारीहरुले कार्यालयलाई टिकटक बनाउने अखडा बन्न थालेका छन् ।