• मुस्कान श्रेष्ठ
वीरगन्ज (पर्सा), २ असार / नेपाल युवा उद्यमी मंच वीरगंजको वार्षिक साधाराण सभा सम्पन्न भएको छ ।
वीरगंज स्थित होटल दियालु लर्ड्समा आयोजित दोश्रो साधारण सभाले राकेश साहको अध्यक्षतामा नयाँ कार्य समिति चयन गरेको छ । जसकोे प्रथम उपाध्यक्षमा सन्दिप अग्रवाल, द्वितीय उपाध्यक्षमा पंकज अग्रवाल चयन भएका छन् ।
त्यस्तै सदस्यमा विकास ठाकुर, अक्षत साह, मनिषा सुनुवार श्रेष्ठ, विश्वास प्रताप साह, काजल सिंह, सुरज रुङ्गटा र दिपाल खन्ना चयन भएका छन् । यस्तै मोहित गुप्ता र किसन क्याललाई आमन्त्रित सदस्यमा मनोनित गरिएको छ ।
कार्यक्रमलाई सम्बोधन गर्दै नेपाल युवा उद्यमी मंच वीरगंजका निवर्तमान अध्यक्ष अनुप अग्रवालले तरलता अभाव, व्यापार घाटाले मुलुकको अर्थतन्त्र संकटमा परेको हुँदा यसतर्फ गम्भिर हुनुपर्ने बताएका छन् । मुलुक आयातमुखी तर्फ मात्र केन्द्रित भईरहेकोे भन्दै मुलुकलाई पर निर्भरता नभई आत्मनिर्भरता तर्फ उन्मुख गर्न मेड ईन नेपालको योजनाले महत्वपूर्ण भुमिका निर्वाह गर्ने बताए ।
उनले स्वदेशी उत्पादको उपयोग गर्न सके देशको अर्थतन्त्रमा सुधार आउनका साथै स्वदेशमै रोजगारी सृजना हुने र उप्तादित वस्तुहरु निर्यात गर्न सकिने बताए ।
यसैगरी वीरगंज महानगरपालिकाका निवर्तमान नगर प्रमुख विजय सरावगीले मुलुकमा विदेशी सञ्चिती घटरिरहेको कारण अर्थतन्त्र संकटामा परेको बताए । उनले मुलुकको आर्थिक अवस्था यस्तै रह्यो भने पाकिस्तान र श्रीलंका जस्तै स्थिति नेपाल पनि हुन सक्ने भन्दै सरकारले ल्याउने गरेको गलत नितिको विरोध गर्नुपर्ने सुझाव दिए ।
नेपाल युवा उद्यमी मंच वीरगंजका मञ्चका निवर्तमान अध्यक्ष अनुप अग्रवालको अध्यक्षता र नेपाल उद्योग वाणिज्य महासंघका मधेश प्रदेश अध्यक्ष गणेश लाठको प्रमुख आतिथ्यमामा सम्पन्न साधारण सभामा वीरगंज उद्योग वाणिज्य संघका अध्यक्ष डा. सुवोध कुमार गुप्ता, उपाध्यक्ष अनिल अग्रवाल, माधव राजपाल, संघका पूर्व अध्यक्षहरु अशोक वैध, सरकारी निकायका प्रतिनिधिहरु, सुरक्षा निकायका प्रमुखहरुको उपस्थिति रहेको थियो ।
प्रतिक्रिया दिनुहोस् !