• हरिशंकर शर्मा
वीरगन्ज, ८ वैशाख / वीरगन्ज महानगरमा नेकपा एमाले र लोकतान्त्रिक समाजवादी पार्टी (लोसपा) बीच चुनावी तालमेल गर्ने भएको छ । नेकपा एमाले एवं लोसपाका नेताहरुले वीरगन्जमा बिहीबार पत्रकार सम्मेलन गरि आसन्न निर्वाचनमा दुबै दल मिलेर निर्वाचनमा सहभागी हुने निर्णय भएको जनाएको छ ।
होटल भिस्वामा आयोजित पत्रकार सम्मेलनमा जारी विज्ञप्तिमा वीरगन्ज महानगरपालिकामा एमाले र लोसपा मिलेर निर्वाचनमा जाने सहमति भएको उल्लेख गरिएको छ । नेकपा एमाले पर्सा जिल्ला अध्यक्ष जयप्रकाश थारु र लोकतान्त्रिक समाजवादी पार्टी नेपाल (लोसपा) पर्सा अध्यक्ष पुरुषोत्तमलाल झा द्वारा हस्ताक्षर गरि जारी गरिएको विज्ञप्तिमा ‘वीरगन्ज महानगरको विकास र प्रगतिको लागि नगारिकलाई केन्द्रमा राखेर लोकतन्त्र, गणतन्त्र, र संघीयता प्रति प्रतिवद्ध रहेको दल एमाले र लोसपा, महानगरपालिकामा मिलेर निर्वाचनमा सहभागी हुन सहमत भएका छौं’ उल्लेख गरिएको छ ।
समृद्ध वीरगन्जको सपनालाई साकार पार्न दुबै पार्टीको यो सहमति अर्थपूर्ण रहेको छ । वीरगन्ज र वीरगन्जबासीको हित, प्रगति, प्रर्वाधार र राजनीतिलाई जनसेवाका लागि सदुपयोग गर्ने उद्देश्य सहित यो सहमति भएको बताइएको छ । यो दुबै पार्टीले स्थानीय तहको निर्वाचनमा वीरगन्ज महानगरपालिकाको प्रमुखमा नेकपा एमाले र उप प्रमुखमा लोसपा नेपालको नेतृत्व रहनेछ भने वडाका सम्बन्धमा आपसी समझदारीमा उम्मेदवार तय गरिने विज्ञप्तिमा उल्लेख गरिएको छ ।
चुनावी तालमेलको क्रममा नेकपा एमालेले महानगरको मेयर तथा लोसपाले उपमेयर लिने गरि सहमति भएको छ । महानगरको ३२ वटै वडाको हकमा भने आपसी सहमतिमा उम्मेदवार तय गर्ने सहमति भएको छ । महानगरको मेयरमा एमालेले वर्तमान मेयर विजय कुमार सरावगीको नाम सिफारिस गरिसकेको छ भने उपमेयरमा लोसपाले अहिलेसम्म उम्मेदवार घोषणा गरेको छैन । तर लोसपाले जिल्ला अध्यक्ष पुरुषोत्तमलाल झा अथवा नेतृ रम्भा मिश्रामध्ये कुनै एक जनालाई उम्मेदवार बनाउने सम्भावना छ ।
पत्रकार सम्मेलनमा बोल्दै नेकपा एमालेका सचिव रघुविर महासेठले वीरगन्जको विकासका लागि एमाले र लोसपाबीच चुनावी तालमेल गर्ने सहमति भएको बताए । मुलुकको अर्थतन्त्रलाई अगाडि बढाउन, बलियो बनाउन, भौतिक पूर्वाधारको विकास गर्न, सामाजिक सुरक्षाभत्ताहरुको सुरक्षित गर्न, मुलुकमा आयात घटाउन तथा निर्यात बढाउन, नेपालमै कृषि उत्पादन बढाउन लगायतका सबै साझा एजेण्डामा हामी एक भएको बताए ।
स्थानीय, प्रदेश अथवा संघीय जुनसुकै निर्वाचनमा संविधानले परिभाषित गरेको भन्दा बाहिर नजाने भन्दै सचिव महासेठले गणतन्त्र, लोकतन्त्र मास्ने अहिलेको सत्तागठबन्धनको विरुद्ध र वीरगन्ज विकास लागि एमाले र लोसपाबीचको चुनावी तालमेलको सहमित अर्थपूर्ण रहेको बताए ।
यसैगरि लोसपाका वरिष्ठ नेता लक्ष्मणलाल कर्णले एमाले र लोसपाबीचको गठबन्धन कुनै नयाँ नरहेको भन्दै यसलाई नवीकरण मात्रै गरिएको बताए । यो गठबन्धनको मौसममा पहिला पनि सहकार्य गरेकै हो, अहिलेपनि स्थानीय आवश्यकता अनुसार तालमेल गर्ने केन्द्रिय समितिले निर्णय अनुसार वीरगन्ज महानगरमा एमालेसँग चुनावी तालमेल गरिएको बताए ।
स्थानीय निकायको निर्वाचनको क्रममा वीरगन्ज महानगरमा चुनावी तालमेल भएको छ, अन्य स्थानको लागि छलफल चलि रहेको बताए । उनले वीरगन्ज विकासको लागि गठबन्धनको दायित्व मात्र नभई जनताहरुको पनि दायित्व रहेकोले यसलाई सबै जनताले मद्दत गर्नेछ भन्ने आफू विश्वस्त रहेको बताए । आगामी दिनमा ओली नेतृत्वको सरकार बने मधेसका बाँकी माग पनि सम्बोधन हुने विश्वासमा अहिले महानगरमा एमालेसँग चुनावी तालमेल गरिएको उनले बताए ।
पत्रकार सम्मेलनमा एमाले पोलिटव्युरो सदस्य पुरुषोत्तम पौडेल, केन्द्रीय सदस्यहरु राज कुमार गुप्ता, बसरुद्धिन अन्सारी र अरविन्द सिंह, जिल्ला अध्यक्ष जयप्रकाश थारु, लोसपाका नेताहरु शशिकपुर मियाँ, लोसपाबाट निर्वाचित सांसद विमल श्रीवास्तव, प्रदेश सांसद रमेश कुर्मी, प्रहलाद गिरी लगायतको पनि उपस्थिति थियो ।
यता लोसपा वीरगन्ज महानगर अध्यक्ष ओमप्रकाश सर्राफले यस चुनावी तालमेलको घोर भत्सर्ना गर्दै विरोध जनाएका छन् । केही सीमिति व्यक्तिको निहित स्वार्थको लागि नेकपा एमालेसँग चुनावी तालमेल गरिएको छ, यसबाट पार्टीलाई ठूलो नोक्सानी हुने भन्दै अध्यक्ष सर्राफले यस रवैयाबाट भोलिका दिनमा पार्टीलाई समाप्त पार्ने खेल भइरहेको बताए ।
प्रतिक्रिया दिनुहोस् !