हरिशंकर शर्मा
बारागढी (बारा), १ चैत । बाराको बारागढी गाउँपालिकामा प्रमुख प्रशासकीय अधिकृतको विवाद नसुल्झिदा शिक्षक कर्मचारीहरुले तलब पाउन सकेका छैनन् । पालिका अन्तर्गत कार्यरत शिक्षक कर्मचारीहरुले समेत तलब नपाउँदा मर्कामा परेका छन् । तराईबासीको ठूलो पर्वको रुपमा रहेको होली पर्वको बेला शिक्षकहरुको तलब निकाशा नहुँदा मर्कमा परेको शिक्षकहरुले गुनासो पोखेका छन् ।
विगत दुई महिनादेखि प्रमुख प्रशाकीय अधिकृतको विवाददलाई लिएर पालिकाको कामकाज प्रभावित छ । यही २०७८ साल माघ ७ गते प्रमुख प्रशासकीय अधिकृत वकिल पाल हाजिर भएपछि विवाद उत्पन्न भएको थियो । तीन वर्षदेखि पालिकाको प्रमुख प्रशासकीय अधिकृतको कार्यभार सम्हाल्दै आएको आमोद चौधरीको ठाउँमा अन्य अधिकृत हाजिर भएपछि त्यही दिनदेखि नेपाली काँग्रेस र संघीय समाजवादी फोरम पार्टीबीच विवाद उत्पन्न भएको थियो । नयाँ अधिकृत हाजिर भएपनि तत्कालीन प्रमुख प्रशासकीय अधिकृत आमोद चौधरी नै चाहिन्छ भनेर नेपाली काँग्रेस पार्टी समर्थकहरुले पालिकामा विरोध प्रदर्शन गरेका थिए भने त्यसको दुई दिनपछि माघ १० गते सरुवा भएर आएका नयाँ अधिकृत नै चाहिन्छ भनेर संघीय समाजवादी पार्टीका समर्थकहरुले विरोध प्रदर्शन गरेका थिए ।
समग्रमा भन्नुपर्दा पालिकाका अध्यक्ष देवदत्त बछार नेपाली काँग्रेस पार्टीबाट निर्वाचित प्रतिनिधि हुन भने उपाध्यक्ष लक्ष्मी देवी राय संघीय समाजवादी पार्टीबाट निर्वाचित जनप्रतिनिधि हुन् । अध्यक्ष र उपाध्यक्षको लडाईमा पालिका अन्तर्गत काम गर्ने कर्मचारीहरु पीडित बनेका छन् । नेपालीमा एउटा उखान छ ‘साढेको जुधाई बाछाको मिचाई’ भने जस्तै पालिकामा कार्यरत शिक्षक कर्मचारीहरु चेपुवामा परेका छन् । अध्यक्षले पहिलाकै अधिकृत चाहिन्छ भनेर अडान राखेका छन् भने उपाध्यक्षले नयाँ अधिकृत चाहिन्छ भनेर अडान राखेका छन् ।
यसरी अध्यक्ष उपाध्यक्षबीचको कुरा नमिलेपछि हालसम्म दुबै पक्षमध्ये कुनै पक्षका समर्थक अधिकृत पालिकामा हाजिर हुन सकेको छैन । जसले गर्दा पालिकाको कामकाज प्रभावित बनेको छ । पालिकामा कार्यरत सूचना अधिकृत महेश ठाकुरलाई निमित्त कार्यालय प्रमुखको जिम्मेवारी दिइएपनि आर्थिक कारोबार भने पुरै ठप्प छ । सामाजिक सुरक्षा भत्ता लगायत अन्य पालिकाका कामकाजहरु भइरहेको छ भने आर्थिक लेनदेनको सम्पूर्ण कामकाज ठप्प रहेको छ । शिक्षक कर्मचारीहरुले विगत दुई तीन महिनादेखि तलब पाएका छैनन् ।
त्यसमा पनि चाँड पर्वको बेला पनि तलब नपाएपछि मन दुःखित भएको शिक्षक भाग्वत साहले बताए । उनका अनुसार होली पर्वको बेला घर परिवारमा पैसा चाहिने भएकोले तलब माग गर्दा पालिकाले अधिकृतको सरुवा भएको कारण तलब दिन समस्या भएको बताएपछि रित्तै हात फर्किनु परेको बताए । चाँडपर्वको बेला एक अर्कासँग खुशी साटासाट गर्नु पर्ने बेलामा तलब नपाएर चाँड पर्व नै खल्लो हुने हो कि चिन्ताले सताएको बताए ।
यसबारे बुझ्नका लागि अध्यक्ष देवदत्त बछारलाई पटक पटक फोन गर्दा पनि फोट उठ्न सकेन् । यसैगरि उपाध्यक्ष लक्ष्मी देवी रायलाई पनि सम्पर्क गर्दा फोन उठेन । यसरी करिब दुई महिनादेखि जनप्रतिनिधिहरुको कारण पालिकाको कामकाज प्रभावित रहेपनि कोही कसैलाई कुनै वास्ता छैन । आफ्नो निहीत स्वार्थको लागि जनप्रतिनिधिहरुले प्रमुख प्रशासकीय अधिृकतको विषयलाई लिएर विवाद गर्दै आएका छन् ।
प्रतिक्रिया दिनुहोस् !