कलैया (बारा), २७ असोज । चाडपर्वको मौका छोपेर उपभोक्ताको स्वास्थ्यमा खेलबाड गर्ने व्यवसायीमाथि गरिएको बजार अनुगमनका क्रममा बाराको कलैयामा म्याद गुज्रिएका खाद्य सामग्री फेला परेका छन् । संयुक्त अनुगमन टोलीले म्याद नाघेका खाद्य सामग्री बिक्रीका लागि राखेको पाइएपछि दुई पसललाई कुल १५ हजार रुपैयाँ जरिवाना गरेको छ ।
आपूर्ति तथा उपभोक्ता संरक्षण कार्यालय वीरगन्जका प्रमुख सुनिल चौरसियाको नेतृत्वमा मंगलबार गरिएको अनुगमनका क्रममा विकास जेनरल स्टोर्सलाई पाँच हजार र माँ अन्नपूर्ण स्वीट्सलाई १० हजार रुपैयाँ जरिवाना गरिएको हो । अनुगमनका क्रममा विकास जेनरल स्टोर्समा म्याद गुज्रिएको पशुपति टी किङ चियापत्ती र कुरकुरे पास्ता फेला परेको थियो । टोलीले ती सामग्री जफत गरी नष्ट गरेको जनाएको छ ।
त्यस्तै, माँ अन्नपूर्ण स्वीट्समा मिठाई बनाउन प्रयोग गरिने खिराको बियाँ, गुलाबजल र केवरा वाटर म्याद नाघेको अवस्थामा भेटिएका थिए । उपभोक्ता संरक्षण ऐनको दफा ३८ को खण्ड (घ) र दफा ३९ को खण्ड (क) अनुसार दुवै पसललाई कारबाही गरिएको कार्यालय प्रमुख चौरसियाले जानकारी दिए । माँ अन्नपूर्ण स्वीट्स यसअघि पनि अनुगमनका क्रममा ५० हजार रुपैयाँ जरिवानामा परेको थियो । पटक–पटकको अनुगमनका बाबजुद सोही पसलमा पुनः म्याद गुज्रिएका सामग्री भेटिनुले बजार अनुगमन र व्यवसायीको जिम्मेवारीमाथि प्रश्न उठाएको छ ।
१० पसलमा अनुगमन, अन्यत्र पनि म्याद नाघेका सामग्री फेला
संयुक्त टोलीले कलैयाका १० वटा पसलमा अनुगमन गरेको थियो । त्यस क्रममा जय महारानी किराना भण्डारमा १०० ग्रामको एक प्याकेट म्याद गुज्रिएको मसला पनि भेटिएको अनुगमन टोलीले जनाएको छ । टोलीले न्यु दास किराना पसल, सिद्धु सिद्धार्थ स्वीट्स, न्यु दास सप्लायर्स, राजेश किराना, कलैया बिरयानी हाउस, लक्ष्मी स्वीट्स र माँ तारा स्वीट्सलगायतका पसलमा समेत निरीक्षण गरेको थियो ।
अनुगमनमा वाणिज्य कार्यालयका आशुतोष कुशवाहा र मधुरेश प्रसाद साह, खाद्य प्रविधि तथा गुण नियन्त्रण कार्यालय वीरगंजका खाद्य निरीक्षक सुरेश कुमार सिंह, जिल्ला प्रशासन कार्यालय बाराका नायब सुब्बा अरुण साह, अस्थायी प्रहरी पोस्ट कलैयाका प्रमुख प्रहरी नायब निरीक्षक बिमलेश यादव तथा जिल्ला प्रहरी कार्यालय बाराका प्रहरी सहायक निरीक्षक उमाशंकर राम सहभागी थिए ।
म्याद र लेबल जाँच गर्न व्यवसायीलाई निर्देशन
अनुगमन टोलीले व्यवसायीलाई म्याद गुज्रिएका खाद्य सामग्री खरिदबिक्री नगर्न, त्यस्ता सामग्री बिक्रीयोग्य वस्तुबाट छुट्टै राख्न तथा सामान खरिद गर्दा लेबल र उपभोग्य मिति अनिवार्य जाँच गर्न निर्देशन दिएको छ । पसलमा सरसफाइ कायम राख्नसमेत व्यवसायीलाई सचेत गराइएको छ । चाडपर्वका बेला खाद्य सामग्रीको माग बढ्ने भएकाले उपभोक्ताले गुणस्तरहीन तथा असुरक्षित वस्तु खरिद गर्नुपर्ने अवस्था आउन नदिन बजार अनुगमनलाई निरन्तरता दिइने कार्यालय प्रमुख चौरसियाले बताए ।
म्याद गुज्रिएका खाद्य सामग्री बिक्रीका लागि राखिनु उपभोक्ताको स्वास्थ्यसँग प्रत्यक्ष जोडिएको विषय हो । त्यसैले अनुगमनका क्रममा कैफियत भेटिएका पसललाई जरिवाना गर्नुका साथै आगामी दिनमा यस्ता गतिविधि दोहोरिन नदिन प्रभावकारी निगरानी आवश्यक देखिएको छ । 
प्रतिक्रिया दिनुहोस् !