गौर (रौतहट), ११ असोज । अविरल वर्षापछि लालबकैया नदीमा आएको बाढीले रौतहटको मौलापुर नगरपालिका–२ मर्यादपुरस्थित तटबन्धमा तीव्र कटान गरिरहेको छ । तटबन्ध कमजोर बन्दै गएपछि नदीको पानी बस्ती र खेतीयोग्य जमिनमा पस्ने जोखिम बढेको छ । नदीको बहाव निरन्तर बढिरहेका बेला तटबन्ध आसपासको भू–भागमा कटान तीव्र भएपछि स्थानीय बासिन्दामा त्रास बढेको छ ।
तटबन्ध भत्किए ठूलो क्षेत्रमा बाढी पस्न सक्ने जोखिम देखिएपछि जिल्ला प्रशासन र स्थानीय तहले जोखिम क्षेत्रको स्थलगत निरीक्षण गरी आवश्यक तयारी अघि बढाएका छन् । रौतहटका प्रमुख जिल्ला अधिकारी लक्ष्मीप्रसाद पौडेल, प्रहरी उपरीक्षक सीताराम रिजालसहित सुरक्षा निकायका अधिकारी तथा मौलापुर नगरपालिकाकी नगर प्रमुख रिनादेवी साहलगायत जनप्रतिनिधिको टोलीले शनिबार मर्यादपुर पुगेर तटबन्ध र कटान प्रभावित क्षेत्रको निरीक्षण गरेको हो । टोलीले स्थानीय बासिन्दासँग छलफल गर्दै सम्भावित जोखिमका विषयमा जानकारी लिनुका साथै नआत्तिन आग्रह गरेको छ ।
प्रमुख जिल्ला अधिकारी पौडेलका अनुसार मर्यादपुरस्थित तटबन्ध भत्किए मौलापुर, गम्हरिया, बरगिनिया, शीतलपुर, सन्तपुर र पेटभरवासहित आसपासका बस्ती प्रत्यक्ष प्रभावित हुन सक्छन् । सम्भावित जोखिमलाई मध्यनजर गर्दै सुरक्षा तथा उद्धार व्यवस्थापनका लागि आवश्यक तयारी गरिएको उनले बताए । पौडेलले जोखिमयुक्त क्षेत्रमा नेपाली सेना, सशस्त्र प्रहरी बल र नेपाल प्रहरीका टोली परिचालन गरी तटबन्धको अवस्था र नदीको बहाव निरन्तर निगरानी गर्न निर्देशन दिइएको जानकारी दिए । उनले प्रभावित क्षेत्रका बासिन्दालाई वर्षाका बेला विशेष सावधानी अपनाउन र जोखिम बढे सुरक्षित स्थानतर्फ जान तयार रहन आग्रह गरेका छन् ।
यता, जिल्ला प्रशासन कार्यालयले फतुवा पुलनजिक भगवानपुर क्षेत्रमा रहेको तटबन्धसमेत नदीको कटानमा परेको जनाएको छ । उक्त क्षेत्रको तटबन्धमा भइरहेको कटानका कारण आसपासका बस्ती हुँदै सदरमुकाम गौरसम्म जोखिम हुन सक्ने भन्दै प्रशासनले त्यहाँका बासिन्दालाई पनि सतर्क रहन आग्रह गरेको छ । लगातारको वर्षाका कारण नदीमा पानीको बहाव बढिरहेकाले तटबन्धको अवस्था र कटानको निगरानीलाई थप तीव्र पारिएको प्रशासनले जनाएको छ । 
प्रतिक्रिया दिनुहोस् !