वीरगंज (पर्सा), १० असोज । गाउँघरमा खेलकुदको माहोल विस्तार गर्दै नयाँ पुस्तालाई फुटबलतर्फ आकर्षित गर्ने उद्देश्यले पर्साको जिराभवानी गाउँपालिका–२ सेढवामा ‘प्रथम जिराभवानी भेट्रान कप–२०८३’ आयोजना हुने भएको छ । सेढवास्थित मिनी रंगशालामा असोज २४ गतेदेखि ३१ गतेसम्म सञ्चालन हुने प्रतियोगितामा ४० वर्ष उमेर पार गरेका खेलाडीहरू प्रतिस्पर्धामा उत्रिनेछन् । जिराभवानी भेट्रान क्लबको आयोजना तथा प्रगति युवा समाज नेपाल, जिराभवानी–२ सेढवाको सहआयोजनामा प्रतियोगिता हुन लागेको हो ।
प्रतियोगिताको तयारीबारे जानकारी गराउन शनिबार जिराभवानी भेट्रान क्लबले पत्रकार सम्मेलन आयोजना गरेको थियो । क्लबका अध्यक्ष चक्रधारी चौधरीको अध्यक्षतामा भएको कार्यक्रममा युवा समाजसेवी कृष्ण चौधरी प्रमुख अतिथिका रूपमा सहभागी थिए । पत्रकार सम्मेलनमा युवा समाजसेवी चौधरीले ग्रामीण क्षेत्रका युवालाई खेलकुदमा जोड्ने र उनीहरूलाई कुलत तथा नकारात्मक गतिविधिबाट टाढा राख्ने उद्देश्यले प्रतियोगिता आयोजना गरिएको बताए ।
उनका अनुसार ४० वर्ष कटिसकेका खेलाडीहरू स्वयं मैदानमा फर्किएर फुटबल खेल्दा नयाँ पुस्तामा समेत खेलप्रतिको आकर्षण र उत्साह बढ्ने अपेक्षा गरिएको छ । ‘खेलकुदले युवालाई अनुशासित बनाउनुका साथै उनीहरूलाई सकारात्मक गतिविधिमा अघि बढाउन महत्वपूर्ण भूमिका खेल्छ,’ चौधरीले भने । प्रतियोगितामा १६ वटा भेट्रान क्लबलाई सहभागी गराउने लक्ष्य आयोजकले राखेको छ ।
जिराभवानी भेट्रान क्लबका अध्यक्ष चक्रधारी चौधरीका अनुसार हालसम्म ११ वटा टोलीको सहभागिता निश्चित भइसकेको छ भने बाँकी टोलीलाई पनि प्रतियोगितामा सहभागी गराउने प्रक्रिया अघि बढिरहेको छ । प्रतियोगिताको विजेताले नगद ५० हजार रुपैयाँसहित ट्रफी प्राप्त गर्नेछन् । त्यस्तै उपविजेता टोलीलाई २५ हजार रुपैयाँ नगदसहित ट्रफी प्रदान गरिने आयोजकले जनाएको छ ।
आयोजकका अनुसार भेट्रान कप केवल प्रतिस्पर्धामा सीमित नभई लामो समयदेखि खेलमैदानबाट टाढिएका ४० वर्षमाथिका खेलाडीलाई पुनः सक्रिय बनाउने अवसरसमेत हुनेछ । साथै प्रतियोगिताले स्थानीयस्तरमा फुटबलको वातावरण निर्माण गर्नुका साथै नयाँ पुस्तालाई खेलकुदमा आकर्षित गर्न महत्वपूर्ण भूमिका खेल्ने अपेक्षा गरिएको छ ।
गाउँस्तरमा भेट्रान खेलाडीलाई केन्द्रमा राखेर आयोजना हुन लागेको प्रतियोगिताले अनुभवी खेलाडीको खेलप्रतिको लगावलाई निरन्तरता दिनुका साथै युवा पुस्तामा खेलकुदप्रतिको सकारात्मक संस्कार विकास गर्ने आयोजकको विश्वास छ ।
प्रतिक्रिया दिनुहोस् !