जनकपुरधाम (धनुषा), ७ असोज । जनकपुरधाम उपमहानगरपालिकाका विभिन्न मासु तथा माछा पसलमा गरिएको संयुक्त अनुगमनका क्रममा १० जना पक्राउ परेका छन् भने मापदण्ड उल्लंघन गर्ने पाँच वटा पसलमाथि दण्ड तथा जरिवाना गरिएको छ ।
मधेश प्रदेशका गृहमन्त्री फकीरा महतोको नेतृत्वमा जिल्ला प्रशासन कार्यालय, नेपाल प्रहरी, सशस्त्र प्रहरी, भेटेरिनरी अस्पताल तथा पशु सेवा विज्ञ केन्द्र, घरेलु तथा साना उद्योग कार्यालय, खाद्य प्रविधि तथा गुण नियन्त्रण कार्यालय र जनकपुरधाम उपमहानगरपालिकाको कृषि तथा पशुपन्छी सेवा शाखासहितको संयुक्त टोलीले विभिन्न मासु तथा माछा पसलको अनुगमन गरेको हो ।
अनुगमनका क्रममा पसलको सरसफाइ, खाद्य स्वच्छता, मासु तथा माछाको गुणस्तर, भण्डारणको अवस्था र व्यवसाय सञ्चालनका लागि आवश्यक मापदण्ड पालना भए–नभएको निरीक्षण गरिएको थियो । अनुगमन टोलीमा जनकपुरधाम उपमहानगरपालिकाका तर्फबाट डा. अमरकुमार साहसमेत सहभागी थिए ।
निर्धारित मापदण्ड तथा प्रचलित नियम उल्लंघन गरेको पाइएपछि पाँच वटा पसललाई दण्ड तथा जरिवाना गरिएको जनाइएको छ । त्यस्तै, नियमविपरीत व्यवसाय सञ्चालन तथा अन्य कसुरमा संलग्न १० जनालाई नियन्त्रणमा लिएर आवश्यक कारबाही अघि बढाइएको टोलीले जनाएको छ ।
उपभोक्ताले दैनिक उपभोग गर्ने मासु तथा माछाको स्वच्छता र गुणस्तरमा प्रत्यक्ष प्रभाव पर्ने भएकाले व्यवसायीले तोकिएको मापदण्ड अनिवार्य रूपमा पालना गर्नुपर्ने गृहमन्त्री महतोले बताए । उनले मापदण्डविपरीत सञ्चालन हुने पसलमाथि निगरानी र कारबाहीलाई निरन्तरता दिइने बताए ।
खुला रूपमा मासु राख्ने, सरसफाइमा ध्यान नदिने, अस्वस्थकर वातावरणमा मासु तथा माछा बिक्री गर्ने र व्यवसाय सञ्चालनसम्बन्धी मापदण्ड पालना नगर्ने प्रवृत्तिमाथि निगरानी बढाइने जनाइएको छ । संयुक्त टोलीले आगामी दिनमा पनि बजार तथा पसलको नियमित अनुगमन गरी उपभोक्तालाई सुरक्षित र गुणस्तरीय मासु तथा माछा उपलब्ध गराउने वातावरण निर्माण गर्ने जनाएको छ ।
प्रतिक्रिया दिनुहोस् !