गौर (रौतहट), २४ साउन । कतारमा गहना बनाइदिने आश्वासन दिएर पाँच लाखभन्दा बढी कतारी रियाल अग्रिम रकम उठाएपछि दुई जना नेपाली सुनचाँदी पसल सञ्चालक फरार भएको आरोप लागेको छ । घटनामा करिब ५० जना नेपाली श्रमिक पीडित बनेका छन् । कतारको चर्चित गोल्ड सुक क्षेत्रमा रहेको ‘गोल्डेन स्टोन ज्वैलरी’ सञ्चालन गर्दै आएका रौतहटको जिंगडवा–९ घर भएका मो. मोजाज आलम र मोहम्मद रैनमाथि गहना तयार पारिदिने भन्दै ग्राहकबाट रकम लिएर सम्पर्कविहीन भएको आरोप लागेको हो ।
पीडितहरूका अनुसार उनीहरूले विभिन्न प्रकारका सुनचाँदीका गहना बनाउन अग्रिम रकम बुझाएका थिए । पसल सञ्चालकहरूले अर्डर धेरै भएकाले गहना तयार हुन समय लाग्ने भन्दै पटक–पटक समय सार्दै आएका थिए । लामो समयसम्म गहना नपाएपछि ग्राहकहरूले खोजी गर्दा पसल नै बन्द रहेको र सञ्चालकहरू सम्पर्कमा नआएको थाहा पाएपछि आफूहरू ठगिएको महसुस गरेको बताएका छन् । ठगीको कुल रकम पाँच लाखभन्दा बढी कतारी रियाल रहेको पीडितहरूको दाबी छ । रकम बुझाएपनि गहना नदिइएपछि उनीहरूले कतारका सम्बन्धित प्रहरी निकायमा औपचारिक उजुरी दर्ता गराएका छन् ।
गैरआवासीय नेपाली संघ (एनआरएनए) कतारका अध्यक्ष कृष्ण पन्थीका अनुसार पीडितहरू संघको सम्पर्कमा आएपछि घटनाबारे जानकारी प्राप्त भएको हो । उनले पीडितलाई आवश्यक सहयोग उपलब्ध गराउन एनआरएनए कतारले नेपाली दूतावास तथा कतारका ठगी र अपराधसम्बन्धी निकायसँग समन्वय गरिरहेको बताए । उजुरीमा उल्लेख भएअनुसार मोजाज आलम र मोहम्मद रैनले करिब सात वर्षदेखि साझेदारीमा उक्त ज्वैलरी व्यवसाय सञ्चालन गर्दै आएका थिए । लामो समयदेखि व्यवसाय गरिरहेका उनीहरू अचानक पसल बन्द गरी सम्पर्कविहीन भएपछि पीडितहरूको चिन्ता बढेको छ ।
हाल कतार प्रहरीले दुवै फरार सञ्चालकको खोजी तीव्र पारेको बताइएको छ । पीडितहरूले आफूहरूको रकम फिर्ता गराइदिन र दोषीमाथि कानुनी कारबाही गर्न सम्बन्धित निकायसँग माग गरेका छन् । घटनाले वैदेशिक रोजगारीका क्रममा विदेशमा व्यवसाय सञ्चालन गर्ने नेपालीप्रति विश्वास गरेर ठूलो रकम अग्रिम बुझाउँदा आवश्यक कानुनी सुरक्षा र लिखित प्रमाणको महत्वलाई समेत उजागर गरेको छ ।
प्रतिक्रिया दिनुहोस् !