वीरगंज (पर्सा), १३ साउन । पर्साको जगरनाथपुर गाउँपालिकाले सार्वजनिक तथा ऐलानी पर्ती जग्गालाई हरियालीमा रूपान्तरण गर्ने अभियानलाई थप तीव्र बनाएको छ । वन तथा वातावरण संरक्षणमा उल्लेखनीय योगदान पुर्याएर मधेश प्रदेशबाट संघीय सरकारको सम्मान प्राप्त गरिसकेको गाउँपालिकाले ‘समृद्धिका लागि वन’ परियोजनाअन्तर्गत थप क्षेत्रमा वृक्षारोपण विस्तार गरेको हो ।
यस अभियानअन्तर्गत बुधबार वडा नम्बर ६ स्थित औराहाको ७ बिघा सार्वजनिक ऐलानी पर्ती जग्गामा एक हजार ५ सय बिरुवा रोपिएको छ । गाउँपालिकाका वन शाखा प्रमुख पप्पु यादवका अनुसार आँप, लिची, कटहर, जामुन, मेवा, मोहबनी, अम्बा, टीक र सिसौलगायत विभिन्न प्रजातिका बिरुवा रोपिएका छन् । रोपिएका बिरुवाको दीर्घकालीन संरक्षण सुनिश्चित गर्न सम्पूर्ण क्षेत्रलाई तारबारसमेत गरिएको उनले जानकारी दिए ।
वृक्षारोपण कार्यक्रम गाउँपालिका अध्यक्ष श्रीकान्त प्रसाद यादवको अध्यक्षतामा सम्पन्न भएको थियो भने कार्यक्रमको उद्घाटन पूर्वमन्त्री तथा नेपाली कांग्रेसका केन्द्रीय सदस्य रमेश रिजालले गरेका थिए । कार्यक्रममा नेपाली कांग्रेस पर्साका सभापति तथा प्रदेशसभा सदस्य जनार्दन सिंह क्षेत्री, पूर्व प्रदेशसभा सदस्य प्रह्लाद गिरी, कांग्रेस मधेश प्रदेशका महामन्त्री बृहस्पति कृष्ण श्रेष्ठ, नेकपा (एमाले)का नेता वीरेन्द्र यादव, गाउँपालिकाकी उपाध्यक्ष बबीता सिंह क्षेत्री, प्रमुख प्रशासकीय अधिकृत सन्देश कुमार यादव, गादीमाई साझेदारी वन उपभोक्ता समूहका अध्यक्ष सहरुम राउत गद्दी तथा वडाध्यक्षहरू नेपाली कुशवाहा, सुभाष यादव, अयोध्या पटेललगायतको सहभागिता रहेको थियो ।
गाउँपालिका अध्यक्ष यादवका अनुसार ‘समृद्धिका लागि वन’ परियोजनाअन्तर्गत यसअघि वडा नम्बर ४ को सोहपुर–सोहरीमा ६ बिघा, वडा नम्बर १ को पिडारी गुठ्ठीमा ७ बिघा तथा वडा नम्बर २ को दसौतामा १२ र १५ बिघा ऐलानी जग्गामा पनि सफलतापूर्वक वृक्षारोपण सम्पन्न भइसकेको छ ।
उनले आगामी एक साताभित्र वडा नम्बर २ कै लक्ष्मीपुरस्थित २० बिघा ऐलानी जग्गामा पनि वृक्षारोपण गरिने तयारी अन्तिम चरणमा पुगेको जानकारी दिए । सार्वजनिक तथा ऐलानी जग्गामा वृक्षारोपण विस्तारले जग्गाको संरक्षण, हरियाली प्रवद्र्धन, वातावरणीय सन्तुलन कायम गर्न तथा दीर्घकालीन रूपमा स्थानीय समृद्धि अभिवृद्धि गर्न महत्वपूर्ण योगदान पुग्ने विश्वास अध्यक्ष यादवले व्यक्त गरे । 
प्रतिक्रिया दिनुहोस् !