लालबन्दी (सर्लाही), २५ असार । सर्लाहीको लालबन्दीमा हतियारधारी समूहले मोबाइल व्यवसायीमाथि लुटपाट गर्ने प्रयासका क्रममा गोली प्रहार भएको छ । बुधबार राति लालबन्दी नगरपालिका–७ र ९ को सीमाक्षेत्रमा पर्ने आइडियल स्कुल नजिकैको एकान्त स्थानमा अज्ञात समूहले मोबाइल पसल सञ्चालकमाथि आक्रमण गरेको हो ।
लालबन्दी नगरपालिका–७ स्थित बजारमा मोबाइल पसल सञ्चालन गर्दै आएका लालबन्दी–९ बस्तीपुरका हरिप्रसाद सापकोटामाथि राति करिब ८ बजेपछि लुटपाटको प्रयास भएको जिल्ला प्रहरी कार्यालय सर्लाहीले जनाएको छ । जिल्ला प्रहरी कार्यालय सर्लाहीका प्रवक्ता प्रहरी नायब उपरीक्षक (डीएसपी) वेदप्रसाद गौतमका अनुसार पसल बन्द गरेर साथीको साथमा मोटरसाइकलमा घर फर्कने क्रममा अर्को मोटरसाइकलमा आएका अपरिचित व्यक्तिले सापकोटालाई रोकेर लुटपाट गर्न खोजेका थिए ।
सो क्रममा सामान्य झडप भएपछि लुटेरा समूहका हतियार बोकेका व्यक्तिले कटुवा पेस्तोलबाट गोली चलाएको अनुसन्धानबाट खुलेको प्रहरीले जनाएको छ । घटनास्थलबाट प्रहरीले पड्किसकेका गोलीका दुईवटा खोका बरामद गरेको छ । गोली प्रहार भएपनि सापकोटा र उनीसँगै मोटरसाइकलमा रहेका व्यक्ति दुवै सुरक्षित रहेको डीएसपी गौतमले जानकारी दिए । घटनामा संलग्न व्यक्तिको पहिचान र खोजीका लागि प्रहरीले अनुसन्धान तीव्र बनाएको छ ।
घटनापछि जिल्ला प्रहरी कार्यालय मलङ्गवाबाट डीएसपीको नेतृत्वमा प्रहरी टोली लालबन्दी पुगेको थियो । प्रहरीले राति अबेरसम्म खोजी अभियान सञ्चालन गरेपनि संलग्न व्यक्तिहरू पक्राउ पर्न सकेका छैनन् । मोबाइल व्यवसायीमाथि भएको गोली प्रहारको घटनापछि लालबन्दी क्षेत्रका व्यवसायी र स्थानीयवासीमा सुरक्षा चिन्ता बढेको छ । लालबन्दी नगरपालिका–९ का वडा सदस्य विनोद तिमल्सिनाले घटनाले स्थानीयमा असुरक्षाको भावना बढाएको बताए ।
प्रतिक्रिया दिनुहोस् !