वीरगंज (पर्सा), २२ असार । वीरगंजस्थित प्रसिद्ध गहवामाई मन्दिरबाट हरेक वर्ष आयोजना हुँदै आएको श्री गहवा माई रथयात्रा–२०८३ को तयारी तीव्र रुपमा चलिरहेको छ । यही असार ३२ गते तदनुसार १६ जुलाई २०२६, बिहीबार हुने रथयात्रामा सहभागी हुन नेपाल तथा भारतका विभिन्न स्थानका भक्तजनलाई निमन्त्रणा वितरण गर्ने अभियान सुरु गरिएको आयोजक श्री गहवामाई तीर्थ क्षेत्र विकास समितिले जनाएको छ ।
रथयात्रा सहयोगी प्रभु साहका अनुसार श्री महवा माई रथयात्रा कार्यसमितिका सदस्यहरू घर–घर पुगेर भक्तजनलाई निमन्त्रणा वितरण गरिरहेका छन् । रथयात्रामा ठूलो संख्यामा श्रद्धालुको सहभागिता गराई धार्मिक कार्यक्रमलाई भव्य र सफल बनाउने उद्देश्यले निमन्त्रणा अभियान सञ्चालन गरिएको उनले बताए । आयोजक समितिले सम्पूर्ण वीरगंज र सो आसपास क्षेत्रका भक्तजनलाई परिवारसहित रथयात्रा, भजन–कीर्तन, छप्पन भोग तथा महाप्रसाद भण्डारामा सहभागी भई धार्मिक पुण्य लाभ लिन आग्रह गरेको छ ।
समितिका अनुसार असार ३२ गते (१६ जुलाई) बिहान ७ः३० बजेदेखि रथयात्रा सुरु हुनेछ भने सोही दिन साँझ ६ः०० बजेदेखि भजन–कीर्तन आयोजना गरिनेछ । त्यसैगरी साउन १ गते (१७ जुलाई) बिहान ६ः०० बजे छप्पन भोग तथा साँझ ४ः०० बजेदेखि महाप्रसाद भण्डारा सञ्चालन गरिने कार्यक्रम रहेको छ । रथयात्रा तथा अन्य धार्मिक कार्यक्रम सफल बनाउन इच्छुक भक्तजनले ग्लोबल आईएमई बैंक लिमिटेड, वीरगंज शाखा को खाता नम्बर ०११०७०१०२६१०२८ वा उपलब्ध गराइएको क्यूआर कोड मार्फत आर्थिक सहयोग गर्न सक्ने आयोजक समितिले जनाएको छ ।
प्रतिक्रिया दिनुहोस् !