जनकपुरधाम (धनुषा), १७ असार । सशस्त्र प्रहरीका असई थमन विक हत्या प्रकरणमा जिल्ला अदालत महोत्तरीबाट जन्मकैद सजाय पाएका मधेश प्रदेशका निलम्बित प्रदेशसभा सदस्य अभिराम शर्मालाई उच्च अदालत जनकपुरले राहत दिएको छ । उच्च अदालतले जिल्ला अदालतको फैसला आंशिक रूपमा उल्टाउँदै शर्मालाई पाँच वर्ष कैद सजाय सुनाएको हो । तत्कालीन लोकतान्त्रिक समाजवादी पार्टी (लोसपा) का संसदीय दलका नेता रहेका शर्मा जिल्ला अदालतबाट जन्मकैदको फैसला भएपछि फरार छन् । सोही मुद्दाका कारण मधेश प्रदेशसभाले उनलाई निलम्बन गरिसकेको छ ।
जिल्ला अदालत महोत्तरीले २०८० मंसिर २८ गते अभिराम शर्मासहित सात जनालाई जन्मकैदको सजाय सुनाएको थियो । तर उच्च अदालत जनकपुरका न्यायाधीशद्वय टेकनारायण कुँवर र मुरारीबाबु श्रेष्ठको संयुक्त इजलासले बुधबार सुनाएको फैसलाअनुसार तीन जनाको हकमा जिल्ला अदालतको जन्मकैदको फैसला सदर गरिएको छ भने चार जनाको सजाय घटाएर पाँच–पाँच वर्ष कैद कायम गरिएको छ । उच्च अदालतले संजय साह, मोहन ठाकुर र प्रदीप रायलाई जिल्ला अदालतले तोकेको जन्मकैद सजाय यथावत् राखेको छ । अभिराम शर्मा, धर्मेन्द्र राय, रामशंकर मिश्र र सुरेश पाण्डेको हकमा भने जन्मकैदको फैसला उल्टाउँदै जनही पाँच वर्ष कैद सजाय सुनाएको हो ।
जिल्ला अदालतको फैसलाविरुद्ध अभिराम शर्माका बुवा महेन्द्र शर्मा, रामशंकर मिश्रकी पत्नी संगीता कुमारी शर्मा, सुरेश पाण्डेका छोरी प्रियंका पाण्डे तथा धर्मेन्द्र रायका दाजु अरविन्द कुमार रायले २०८१ वैशाख ९ गते उच्च अदालतमा पुनरावेदन दिएका थिए । करिब अढाई वर्षसम्म चलेको सुनुवाइ क्रममा ५०औँ पेशीमा अन्तिम फैसला भएको हो । यसअघि ४९ वटा पेशी विभिन्न कारणले स्थगित भएका थिए । यो घटना २०७२ सालको मधेश आन्दोलनका क्रममा भएको थियो ।
भदौ २५ गते संयुक्त राष्ट्रसंघीय मिसनका लागि परीक्षा दिएर ड्युटीमा महोत्तरी आएका असई थमन विकमाथि आन्दोलनकारीले आक्रमण गरेका थिए । जलेश्वर अस्पतालमा प्राथमिक उपचारपछि थप उपचारका लागि एम्बुलेन्समार्फत जनकपुर ल्याइँदै गर्दा तत्कालीन अनैठा गाविस क्षेत्रमा आन्दोलनकारीले एम्बुलेन्सबाट निकालेर कुटपिट गरेका थिए । सोही घटनामा गम्भीर घाइते भएका विकको मृत्यु भएको थियो ।
प्रतिक्रिया दिनुहोस् !