बसवरिया (सर्लाही), ७ असार । सर्लाहीमा भैंसी गोठमा सुतिरहेका एक वृद्धको धारिलो हतियार प्रहार गरी हत्या गरिएको छ ।
बसबरिया गाउँपालिका–१ मानपुर निवासी ५२ वर्षीय होशनारायण राय यादवको शनिबार मध्यराति हत्या भएको जिल्ला प्रहरी कार्यालय सर्लाहीले जनाएको छ ।
प्रहरीका अनुसार यादव आफ्नै भैंसी गोठमा सुतिरहेका बेला राति करिब १२ बजे अपरिचित व्यक्तिहरूको समूहले उनको घाँटीमा धारिलो हतियार प्रहार गरेको थियो । आक्रमणबाट गम्भीर घाइते भएका उनलाई परिवारका सदस्यले उपचारका लागि अस्पताल लैजाने प्रयास गरेका थिए । तर, बाटोमै उनको मृत्यु भएको प्रहरीले जनाएको छ ।
घटनापछि शवलाई पोस्टमार्टमका लागि प्रादेशिक अस्पताल मलङ्गवामा राखिएको छ । हत्याको कारण तथा घटनामा संलग्न व्यक्तिहरूको पहिचान हालसम्म खुल्न नसकेको प्रहरीले जनाएको छ । इलाका प्रहरी कार्यालय बरहथवाका डीएसपी गोपीकृष्ण सुवेदीले घटनाबारे गहन अनुसन्धान सुरु गरिएको जानकारी दिएका छन् । उनका अनुसार घटनामा संलग्न व्यक्तिहरूको खोजी तथा पक्राउका लागि प्रहरी परिचालन गरिएको छ ।
मृतकका जेठा छोरा सुवासकुमार यादवले आफ्ना बुबा सरल र शान्त स्वभावका व्यक्ति रहेको तथा कसैसँग कुनै प्रकारको व्यक्तिगत विवाद नरहेको बताए । उनले हत्याको कारणबारे परिवारसमेत अन्योलमा रहेको उल्लेख गरे । घटनापछि स्थानीय क्षेत्रमा त्रासको वातावरण सिर्जना भएको छ । प्रहरीले घटनाका सबै पक्षबाट अनुसन्धान अघि बढाएको र दोषीलाई कानुनी दायरामा ल्याउन प्रयास भइरहेको जनाएको छ । 
प्रतिक्रिया दिनुहोस् !