वीरगंज (पर्सा), २६ जेठ । पर्साको जगरनाथपुर गाउँपालिका–५ मसिहानीमा छठघाट निर्माण कार्यको मंगलबार औपचारिक रूपमा शिलान्यास गरिएको छ । गाउँपालिका अध्यक्ष श्रीकान्त प्रसाद यादवले निर्माण कार्यको शुभारम्भ गर्दै धार्मिक तथा सांस्कृतिक पूर्वाधार विकासप्रति स्थानीय सरकारको प्रतिबद्धता दोहोर्याएका छन् ।
शिलान्यास कार्यक्रमलाई सम्बोधन गर्दै अध्यक्ष यादवले छठ पर्व नेपाली समाजको आस्था, संस्कृति र मौलिक पहिचानसँग गाँसिएको महत्वपूर्ण पर्व भएको उल्लेख गरे । श्रद्धालु भक्तजनलाई सहज र व्यवस्थित वातावरण उपलब्ध गराउने उद्देश्यले छठघाट निर्माणलाई प्राथमिकतामा राखिएको उनले बताए ।
उनले विकास निर्माणका योजनासँगै स्थानीय संस्कृति, परम्परा र जनभावनाको सम्मान गर्दै गाउँपालिकाको समग्र समृद्धिका लागि निरन्तर काम भइरहेको स्पष्ट पारे । साथै, आयोजना कार्यान्वयनमा सहयोग पुर्याउने जनप्रतिनिधि, कर्मचारी, स्थानीयवासी तथा सरोकारवाला सबैप्रति आभार व्यक्त गरे ।
मधेश प्रदेश सरकारको आर्थिक सहयोगमा निर्माण हुन लागेको उक्त छठघाट आगामी असार १५ गतेभित्र सम्पन्न गर्ने लक्ष्य राखिएको जगरनाथपुर गाउँपालिकाले जनाएको छ । स्थानीयवासीले छठघाट निर्माणपछि छठ पर्वलगायत विभिन्न धार्मिक तथा सांस्कृतिक कार्यक्रम सञ्चालन गर्न थप सहजता हुने विश्वास व्यक्त गरेका छन् । उनीहरूका अनुसार यसले धार्मिक पर्यटन तथा स्थानीय समुदायको सामाजिक गतिविधिलाई समेत टेवा पुर्याउने अपेक्षा गरिएको छ ।
प्रतिक्रिया दिनुहोस् !