गौशाला (महोत्तरी), २१ जेठ । महोत्तरीको गौशाला नगरपालिकाले बढ्दो गर्मी र तातो हावाको प्रभावलाई ध्यानमा राख्दै नगर क्षेत्रभित्रका सबै विद्यालयमा चार दिनका लागि पठनपाठन स्थगित गरेको छ । अत्यधिक तापक्रमका कारण विद्यार्थीहरूको स्वास्थ्यमा प्रतिकूल असर पर्न सक्ने सम्भावनालाई मध्यनजर गर्दै नगरपालिकाले यो निर्णय गरेको हो ।
नगरपालिकाले जारी गरेको सूचनाअनुसार जेठ २२ गते शुक्रबारदेखि जेठ २५ गते सोमबारसम्म नगरपालिकाअन्तर्गत सञ्चालित सामुदायिक, संस्थागत तथा धार्मिक विद्यालयहरूमा शैक्षिक गतिविधि बन्द रहनेछन् । मिति २०८३ जेठ २१ गते बसेको नगर कार्यपालिकाको निर्णयअनुसार उक्त बिदा घोषणा गरिएको जनाइएको छ ।
पछिल्ला दिनहरूमा तापक्रम निरन्तर बढ्दै जाँदा विद्यालयमा नियमित पठनपाठन सञ्चालन गर्न कठिनाइ उत्पन्न भएको र विद्यार्थीहरू गर्मीजन्य स्वास्थ्य समस्याको जोखिममा पर्न सक्ने अवस्था देखिएपछि सावधानीस्वरूप बिदा दिइएको नगरपालिकाको भनाइ छ ।
प्रमुख प्रशासकीय अधिकृत ओमबहादुर अधिकारीद्वारा जारी सूचनामा विद्यार्थीहरूको स्वास्थ्य, सुरक्षा र हितलाई पहिलो प्राथमिकतामा राखेर निर्णय गरिएको उल्लेख गरिएको छ । साथै अभिभावक तथा विद्यालय प्रशासनलाई बालबालिकाको स्वास्थ्यप्रति विशेष सचेत रहन अनुरोध गरिएको छ । यस निर्णयसँगै महोत्तरी जिल्लामा गर्मीका कारण विद्यालय बिदा दिने पालिकाको संख्या दुई पुगेको छ । यसअघि बर्दिबास नगरपालिकाले पनि अत्यधिक गर्मीका कारण दुई दिनका लागि विद्यालय बन्द गर्ने निर्णय गरेको थियो ।
जलवायु परिवर्तन र बढ्दो तापक्रमका कारण तराई–मधेसका जिल्लाहरूमा पछिल्ला वर्षहरूमा गर्मीजन्य समस्या बढ्दै गएको छ । विज्ञहरूले अत्यधिक गर्मीका बेला बालबालिकालाई घाममा लामो समय नराख्न, पर्याप्त पानी पिउन र स्वास्थ्य सुरक्षाका उपाय अपनाउन सुझाव दिएका छन् । 
प्रतिक्रिया दिनुहोस् !