वीरगंज (पर्सा), १८ जेठ । पर्साको जगरनाथपुर गाउँपालिकाले आर्थिक वर्ष २०८३/८४ का लागि आफ्नो वार्षिक नीति तथा कार्यक्रम सार्वजनिक गरेको छ । गाउँपालिकाका अनुसार मधेश प्रदेशमै आगामी आर्थिक वर्षको नीति तथा कार्यक्रम प्रस्तुत गर्ने पहिलो स्थानीय तहका रूपमा जगरनाथपुर गाउँपालिका अघि आएको हो । गाउँपालिका वडा नम्बर ५ मा रहेको कृषि तथा पशुपन्छी सेवा केन्द्रको सभाहलमा आयोजित कार्यक्रममा गाउँपालिका अध्यक्ष श्रीकान्त प्रसाद यादवले औपचारिक रूपमा नीति तथा कार्यक्रम सार्वजनिक गर्दै कार्यक्रमको उद्घाटन गरेका थिए ।
कार्यक्रममा बोल्दै अध्यक्ष यादवले आगामी वर्ष पनि शिक्षा, स्वास्थ्य र कृषिलाई विकासका मुख्य आधारका रूपमा प्राथमिकतामा राखिने स्पष्ट पारे । उनले स्थानीयवासीलाई सहज स्वास्थ्य सेवा उपलब्ध गराउने उद्देश्यले सहुलियत दरमा पालिका औषधि पसल सञ्चालन गरिने, औराहा स्वास्थ्य चौकीमा प्रयोगशाला सेवा विस्तार गरिने तथा ‘खाल्डामुक्त पालिका अभियान’ अन्तर्गत सडक एम्बुलेन्स सेवा सञ्चालनमा ल्याइने जानकारी दिए ।
उनका अनुसार सामुदायिक स्वास्थ्य सेवा विस्तार, गरिब तथा दलित समुदायका बस्ती र टोलमा निःशुल्क ट्युसन कक्षा सञ्चालन, विद्यार्थी लक्षित अनलाइन कोचिङ कार्यक्रम, सामुदायिक विद्यालयमा ई–हाजिरी प्रणाली लागू गर्ने योजना आगामी वर्ष पनि निरन्तरता पाउनेछ । साथै कृषकलाई ५० प्रतिशत अनुदानमा बीउबिजन उपलब्ध गराउने र सिँचाइका लागि मोटर वितरण कार्यक्रमलाई समेत निरन्तर सञ्चालन गरिनेछ । गाउँपालिकाकी उपाध्यक्ष बबिता सिंहले नीति तथा कार्यक्रम प्रस्तुत गर्दै कृषि क्षेत्रको आधुनिकीकरणका लागि कृषि प्रयोगशाला स्थापना गरिने तथा गाउँपालिकाको आफ्नै प्रशासनिक भवनबाट एकद्वार प्रणालीमार्फत सेवा प्रवाह गर्ने योजना समावेश गरिएको बताइन् ।
गाउँपालिका अध्यक्ष यादवको अध्यक्षतामा सम्पन्न कार्यक्रममा प्रमुख प्रशासकीय अधिकृत सन्देश कुमार यादव, वडाध्यक्षहरू लक्ष्मी साह तेली, नेपाली प्रसाद कुशवाहा, सुभाष कुमार यादव, प्रभु प्रसाद नुनिया, विहारी महतो नुनिया, अयोध्या प्रसाद पटेलसहित गाउँसभा सदस्य तथा कर्मचारीहरूको उल्लेख्य उपस्थिति रहेको थियो । कार्यक्रमको सञ्चालन स्वास्थ्य संयोजक प्रभेन्द्र साहले गरेका थिए । 
प्रतिक्रिया दिनुहोस् !