काठमाडौँ, १६ जेठ । नेपाल कम्युनिष्ट पार्टीका सहसंयोजक तथा पूर्वप्रधानमन्त्री माधवकुमार नेपालले आफ्नो पार्टी अहिले पनि राजनीतिक रूपमा मजबुत अवस्थामा रहेको दाबी गरेका छन् । विरोधी शक्तिहरू आक्रामक देखिएपनि आफूहरूलाई टाउको लुकाएर हिँड्नुपर्ने वा भाग्नुपर्ने कुनै कारण नरहेको उनले बताएका छन् ।
शनिबार काठमाडौंमा आयोजित अखिल नेपाल महिला संगठनको एकता राष्ट्रिय भेलालाई सम्बोधन गर्दै नेपालले राष्ट्रिय स्वतन्त्र पार्टी (रास्वपा) को निर्वाचन सफलतालाई ‘सुनामी’ सँग तुलना गरे । उनका अनुसार रास्वपाले हासिल गरेको उल्लेखनीय मत र सिटको पछाडि रहेका कारणबारे अझै खोजबिन र बहस भइरहेको छ ।
उनले पार्टीभित्रकै केही व्यक्तिहरूले समय–समयमा विभिन्न रहस्य सार्वजनिक गर्ने चेतावनी दिँदै आएको उल्लेख गर्दै त्यसबेला भएका घटनाक्रमबारे भविष्यमा थप तथ्य बाहिर आउने संकेत गरे । निर्वाचन प्रक्रियामा विभिन्न निकायहरूको भूमिका, मतपत्र व्यवस्थापन तथा अन्य पक्षहरूबारे समेत एक दिन वास्तविकता खुल्ने उनको भनाइ थियो । नेपालले निर्वाचनको परिणामलाई केवल सामान्य राजनीतिक परिवर्तनका रूपमा नभई असाधारण घटनाका रूपमा व्याख्या गरे । उनले त्यसको पृष्ठभूमि र त्यसबेलाको परिस्थितिबारे अझै गहिरो अध्ययन आवश्यक रहेको बताए ।
भेलालाई सम्बोधन गर्ने क्रममा उनले नेपालको लोकतान्त्रिक अभ्यासमा महिला र दलित समुदायको सहभागिता सुनिश्चित गर्न आफ्नो राजनीतिक धाराले खेलेको भूमिकाको पनि चर्चा गरे । वि.सं. २०४७ सालको संविधान निर्माण प्रक्रियादेखि नै राज्यका महत्वपूर्ण निकायमा महिलाको प्रतिनिधित्व अनिवार्य बनाउन आफूहरू अग्रसर रहेको उनको दाबी थियो । राष्ट्रपति, उपराष्ट्रपति, सभामुख, उपसभामुखलगायत संवैधानिक तथा राजनीतिक पदहरूमा महिला सहभागिता सुनिश्चित गर्ने व्यवस्थाको श्रेय आफ्नो राजनीतिक धारालाई जाने उनले बताए ।
अहिले राजनीतिक सफलता हासिल गरेका दलका नेताहरूले त्यस प्रक्रियामा कति योगदान दिएका थिए भन्ने प्रश्नसमेत उनले उठाए । नेपालले लोकतान्त्रिक अधिकार, समावेशी प्रतिनिधित्व र सामाजिक न्यायका लागि आफूहरूले लामो समयदेखि संघर्ष गर्दै आएको उल्लेख गर्दै ती उपलब्धिहरूको मूल्यांकन इतिहासले गर्ने विश्वास व्यक्त गरे । 
प्रतिक्रिया दिनुहोस् !