वीरगंज (पर्सा), ९ जेठ । पर्सामा जिल्ला स्तरीय १६औं राष्ट्रपति रनिङ्ग शिल्ड प्रतियोगिता शनिबारदेखि सुरु भएको छ । वीरगंजस्थित नारायणी रंगशालामा सुरु भएको प्रतियोगिताको उद्घाटन मधेश खेलकुद परिषद्का सदस्य सचिव शिवजी गुप्ताले गरेका हुन् । उद्घाटन समारोहलाई सम्बोधन गर्दै सदस्य सचिव गुप्ताले प्रतियोगितामा सहभागी विद्यार्थीहरूलाई अनुशासन, समर्पण र खेलभावनासहित आफ्नो प्रतिभा प्रदर्शन गर्न आग्रह गरे । उनले प्रतियोगितालाई व्यवस्थित, मर्यादित र सफल बनाउन सुरक्षा, व्यवस्थापन तथा प्राविधिक तयारीमा विशेष ध्यान दिनुपर्ने आवश्यकता औंल्याए ।
पर्सा जिल्ला खेलकुद विकास समितिको आयोजनामा सञ्चालन भइरहेको प्रतियोगिता आइतबारसम्म जारी रहनेछ । प्रतियोगितामा वीरगंज महानगरपालिका, पर्सागढी नगरपालिका, संखुवा प्रसौनी गाउँपालिका र ठोरी गाउँपालिकाका गरी ३७५ विद्यार्थी सहभागी भएका छन् । प्रतियोगिताअन्तर्गत एथलेटिक्स, भलिबल, कबड्डी, कराँते, तेक्वान्दोलगायत विभिन्न विधामा प्रतिस्पर्धा भइरहेको छ । जिल्लाका विद्यालयस्तरका छात्र–छात्राबीच हुने खेल प्रतिस्पर्धाले नयाँ खेल प्रतिभा पहिचान गर्नुका साथै खेलकुद विकासमा महत्वपूर्ण योगदान पुग्ने अपेक्षा आयोजकको छ ।
पर्सा जिल्ला खेलकुद विकास समितिका अध्यक्ष दिपक साह कानुको अध्यक्षतामा सम्पन्न उद्घाटन कार्यक्रममा कार्यालय प्रमुख महमद नाजिर हुसेन, जिल्ला प्रहरी कार्यालय पर्साका प्रहरी नायब उपरीक्षक राजु कार्की, सशस्त्र प्रहरी नायब उपरीक्षक मोहनराज निरौला, नेपाली सेनाको श्री जंग गण वीरगंजका उपसेनानी सन्देश तामाङ, नेपाल कबड्डी संघका केन्द्रीय सचिव महम्द फिरोज शेख, नेपाल खेलकुद पत्रकार मञ्च पर्साका अध्यक्ष तिवारी यादव, पत्रकार शम्भु कुमार सुमन तथा एथलेटिक्स प्रशिक्षक विश्वेश्वर पटेल र आकाश पटेललगायतको सहभागिता रहेको थियो । 
प्रतिक्रिया दिनुहोस् !