वीरगंज (पर्सा), ४ जेठ । नागरिक बचाऔं महाअभियानका संस्थापक एवं सामाजिक अभियन्ता दुर्गा प्रसाईंले वर्तमान राजनीतिक व्यवस्था, सरकार, पुराना राजनीतिक दल र राज्य संयन्त्रप्रति तीव्र असन्तुष्टि व्यक्त गर्दै ‘यो व्यवस्था नै फेर्नुपर्ने अवस्था आएको’ बताएका छन् । वीरगंज आउने क्रममा सिमरा एयरपोर्टमा टिबी वीरगंजका संचालक एवं पत्रकार धु्रव साहसँगको संवादमा उनले आफू सरकारको होइन, ‘नागरिक र उत्पीडित वर्गको मान्छे’ भएको दाबी गर्दै सुकुम्बासी, सहकारी पीडित, लघुवित्त पीडित र विस्थापित जनताको पक्षमा आन्दोलन जारी रहने घोषणा गरे ।
प्रसाईंले अहिलेको राज्य प्रणालीकै कारण हजारौं नागरिक भूमिहीन र विस्थापित बन्न बाध्य भएको आरोप लगाए । सहकारी, लघुवित्त र बैंकिङ प्रणालीका कारण सर्वसाधारण सडकमा पुगेको उल्लेख गर्दै उनले राज्यको आर्थिक नीति असफल भएको दाबी गरे । ‘व्यापार–व्यवसाय बिग्रियो, जनताको घरबार गयो, तर सरकार जनताको पक्षमा उभिन सकेन,’ उनले भने ।
वीरगंज, कलैया लगायत मधेशका विभिन्न क्षेत्रमा भइरहेको संरचना हटाउने अभियानप्रति आक्रोश व्यक्त गर्दै प्रसाईंले रातिको समयमा सेना र प्रहरी परिचालन गरेर घर भत्काउनु अमानवीय भएको टिप्पणी गरे । ‘महाभारतको युद्धमा समेत सूर्यास्तपछि लडाइँ रोकिन्थ्यो, तर यहाँ जनताको घरमा राति डोजर चलाइयो,’ उनले भने । सडक विस्तार आवश्यक भएपनि जनतालाई आतंकित पार्ने शैली अस्वीकार्य भएको उनको भनाइ थियो ।
उनले आफूलाई वीरगंज आउन पटक–पटक रोकिएको दाबी गर्दै राज्यले राजनीतिक पूर्वाग्रहका आधारमा आफ्नो गतिविधि नियन्त्रण गर्न खोजेको आरोप लगाए । ‘पहिलोपटक पूजा गर्न आउँदा रोकियो, दोस्रोपटक पनि रोकियो, अहिले मात्रै आउन पाएँ,’ उनले भने । आफू आन्दोलनका कारण चुनावी राजनीतिमा नगएको उल्लेख गर्दै उनले ‘संसद्भन्दा सडकको प्रतिपक्ष बलियो हुनुपर्छ’ भन्ने धारणा राखे ।
प्रसाईंले संसद् र पुराना राजनीतिक दलप्रति पनि कटाक्ष गरे । उनले सदन जनताको आवाज उठाउने थलो नभई ‘चुम्बन र सत्ताको खेल हुने ठाउँ’ बनेको टिप्पणी गरे । प्रचण्ड, केपी शर्मा ओली र शेरबहादुर देउवामाथि गरिबविरोधी राजनीति गरेको आरोप लगाउँदै उनले ‘पुराना दलहरूको रिस गरिबमाथि पोखिएको’ दाबी गरे । घर भत्काउने, सुकुम्बासी विस्थापित गर्ने र साना व्यवसायीलाई संकटमा धकेल्ने काम राज्यकै योजनाअनुसार भइरहेको उनको आरोप थियो ।
उनले वैदिक सनातन हिन्दू राष्ट्र र राजसंस्थाको पुनःस्थापनाबिना देशमा स्थायित्व सम्भव नभएको दाबी गरे । ‘राजा बिना देश रहँदैन,’ भन्दै उनले वर्तमान संघीय लोकतान्त्रिक व्यवस्थाले राष्ट्रलाई अस्थिरता, भ्रष्टाचार र अराजकतामा धकेलेको टिप्पणी गरे । राष्ट्रियता, धर्म र परम्परागत संरचनाको पुनःस्थापनाले मात्र देशको उन्नति सम्भव हुने उनको भनाइ थियो ।
सुरक्षानिकायमाथि पनि प्रसाईंले आक्रोश पोखेका छन् । नेपाली सेना सीमामा खटिनुपर्नेमा सर्वसाधारणका घर भत्काउन प्रयोग गरिएको भन्दै उनले असन्तुष्टि जनाए । ‘लिम्पियाधुरा र कालापानीमा हुनुपर्ने सेना अहिले सुकुम्बासीको घर भत्काउन प्रयोग भइरहेको छ,’ उनले भने । सेना राष्ट्रिय गौरवको प्रतीक भएको उल्लेख गर्दै राजनीतिक स्वार्थका लागि परिचालन हुनु दुःखद भएको टिप्पणी गरे ।
प्रसाईंले प्रहरी र सेनाले प्रधानमन्त्रीलाई खुसी पार्न ‘र्याप गीत गाउने अवस्था आएको’ भन्दै राज्य संयन्त्रको गरिमा खस्किएको आरोप लगाए । ‘देश बन्दैछ भनेर गीत गाउने काम सुरक्षानिकायको होइन,’ उनले भने । वर्तमान सरकारले देश सञ्चालन गर्न नसकेको र जनताको विश्वास गुमाइसकेको दाबी पनि उनले गरे ।
मधेशका जनताको पीडालाई राजनीतिक रूपमा प्रयोग गरिएको आरोप लगाउँदै उनले मधेशी जनतापनि समान नेपाली नागरिक भएको बताए । ‘राजनीतिका लागि मधेशी भनेर विभाजन गरियो,’ उनले भने । सम्पूर्ण नेपालीलाई एकताबद्ध भएर राष्ट्र, धर्म र नागरिक अधिकारको पक्षमा उभिन उनले आह्वान गरे । आफ्नो अभियान कुनै हालतमा नरोकिने चेतावनी दिँदै प्रसाईंले देशभर आन्दोलनलाई तीव्र बनाउने घोषणा गरेका छन् । उनले वीरगंजस्थित गहवा माई मन्दिरमा उपस्थित भएर आन्दोलनलाई समर्थन गर्नसमेत सर्वसाधारणलाई आह्वान गरेका छन् । 
प्रतिक्रिया दिनुहोस् !