वीरगंज (पर्सा), २९ वैशाख । वीरगंजमा बढ्दो गर्मीसँगै रक्त सञ्चार केन्द्रमा विभिन्न रक्त समूहको अभाव चुलिएको छ । केन्द्रका प्रमुख सरोजराज पाण्डेका अनुसार हाल ‘ओ पोजेटिभ’ (O±ve) बाहेक अन्य रक्त समूहको पर्याप्त मौज्दात नरहेको अवस्था छ ।
वीरगंजका अस्पतालहरूमा उपचार गराइरहेका बिरामीको संख्या बढ्दै जाँदा रगतको माग अत्यधिक बढेको उनले बताए । दुर्घटना, शल्यक्रिया, प्रसूति तथा दीर्घरोगबाट पीडित बिरामीका लागि दैनिक ठूलो परिमाणमा रगत आवश्यक पर्ने भए पनि पछिल्ला दिनमा रक्तदान कार्यक्रम घट्दा समस्या गम्भीर बन्दै गएको केन्द्रले जनाएको छ ।
गर्मी मौसमका कारण विभिन्न संघसंस्था, क्लब तथा सामाजिक समूहले नियमित सञ्चालन गर्दै आएका रक्तदान कार्यक्रम कम भएपछि रगत संकलन प्रभावित भएको प्रमुख पाण्डेको भनाइ छ । ‘अस्पतालबाट दैनिक रूपमा रगतको माग आइरहेको छ, तर आवश्यक मात्रामा उपलब्ध गराउन कठिन भइरहेको छ,’ उनले बताए ।
रक्त सञ्चार केन्द्रले सामाजिक संस्था, युवा क्लब, शैक्षिक संस्था तथा सर्वसाधारणलाई स्वेच्छिक रक्तदानमा सहभागी हुन र रक्तदान कार्यक्रम आयोजना गर्न आग्रह गरेको छ । स्वस्थ व्यक्तिले गरेको एक युनिट रक्तदानले कसैको ज्यान बचाउन सक्ने भन्दै केन्द्रले सबैलाई मानवीय सेवामा जोडिन अपिल गरेको छ ।
रक्त अभावकै कारण आकस्मिक उपचार तथा शल्यक्रियासमेत प्रभावित हुन सक्ने चेतावनी दिँदै केन्द्रले समयमै रक्तदान गरी सहयोग गर्न सबैमा अनुरोध गरेको छ । 
प्रतिक्रिया दिनुहोस् !