काठमाडौँ, २५ वैशाख । अख्तियार दुरुपयोग अनुसन्धान आयोगले प्रहरी वृत्त मालीगाउँ, काठमाडौंमा कार्यरत प्रहरी नायव निरीक्षक (सई) दिनेश राउत विरुद्ध घुस/रिसवत लिएको आरोपमा विशेष अदालत काठमाडौंमा भ्रष्टाचार मुद्दा दायर गरेको छ । बैंकिङ्ग कसुरअन्तर्गतको चेक बाउन्स सम्बन्धी मुद्दा मिलाइदिने तथा सेवाग्राहीको रकम फिर्ता गराइदिने आश्वासन दिएर उनले घुस असुलेको आरोप आयोगले लगाएको हो ।
आयोगका अनुसार सई राउतले मुद्दाको प्रक्रिया सहज बनाइदिने, मिलापत्र गराइदिने तथा रकम फिर्ता दिलाउने भन्दै सेवाग्राहीसँग आर्थिक लेनदेनको माग गरेका थिए । प्राप्त गोप्य सूचना तथा उजुरीपछि अख्तियारको टोलीले निगरानी बढाएको थियो । त्यसक्रममा उनलाई सेवाग्राहीबाट २० हजार रुपैयाँ घुस लिइसकेको अवस्थामा नियन्त्रणमा लिइएको आयोगले जनाएको छ ।
अनुसन्धानका क्रममा राउतले आफ्नो पद र अधिकारको दुरुपयोग गर्दै विभिन्न बहानामा सेवाग्राहीलाई दबाब र हैरानी दिँदै रकम असुलेको पुष्टि भएको अख्तियारको दाबी छ । सामान्य कानुनी प्रक्रियालाई प्रभाव पार्ने तथा मिलापत्र गराउने नाममा प्रहरी अधिकृतबाटै घुस मागिएको घटनाले प्रहरी संगठनको आचरण र सेवाप्रवाहमाथि पुनः प्रश्न उठाएको छ ।
अख्तियारले उक्त कार्यलाई भ्रष्टाचार निवारण ऐन, २०५९ अन्तर्गतको कसुर ठहर गर्दै बिगो २० हजार रुपैयाँ कायम गरेको छ । सोही बराबर जरिवाना तथा कैद सजायको मागदाबी सहित शुक्रबार विशेष अदालत काठमाडौंमा आरोपपत्र दायर गरिएको आयोगका प्रवक्ता सुरेश न्यौपाने ले जानकारी दिएका छन् ।
पछिल्लो समय सेवा प्रवाह सहज बनाइदिने, मुद्दा मिलाइदिने वा अनुसन्धान प्रभावित पार्ने नाममा हुने घुस लेनदेनका घटनाले सार्वजनिक निकायप्रतिको जनविश्वास कमजोर बनाउँदै गएको छ । विशेषगरी कानुन कार्यान्वयन गर्ने निकायभित्रै भ्रष्टाचारका घटना सार्वजनिक भइरहँदा सुशासन र पारदर्शितामाथि गम्भीर प्रश्न उठ्न थालेका छन् । 
प्रतिक्रिया दिनुहोस् !