वीरगंज (पर्सा), १५ वैशाख । वीरगंज महानगरपालिका–२० हरपतगञ्जका बासिन्दाले ठेकेदारको लापरवाहीका कारण सडक निर्माण कार्य वर्षौँदेखि अधुरै रहेको भन्दै कडा असन्तोष व्यक्त गरेका छन् । करिब आठ वर्षअघि भएको ठेक्का सम्झौताअनुसार समयमै सम्पन्न हुनुपर्ने योजना अझै पूरा नभएपछि स्थानीयहरू आक्रोशित बनेका हुन् ।
स्थानीयका अनुसार अधुरो सडकका कारण दैनिक आवागमनमा समस्या उत्पन्न भएको छ भने विकास निर्माणप्रतिको विश्वास समेत कमजोर बन्दै गएको छ । समस्या समाधानको माग गर्दै उनीहरूले जिल्ला प्रशासन कार्यालय पर्सा पुगेर ज्ञापनपत्र बुझाउँदै निर्माण कार्य शीघ्र सम्पन्न गर्न र जिम्मेवारमाथि कारबाही गर्न माग गरेका छन् ।
उता, वीरगंज महानगरभित्रका अन्य सडक आयोजना पनि बजेट अभाव र विभिन्न प्राविधिक अवरोधका कारण अघि बढ्न नसकेको बताइएको छ । सघन शहरी तथा भवन निर्माण आयोजना कार्यालय पर्सा ले करिब १७ करोड रुपैयाँ बराबरको बिल भुक्तानी नगर्दा निर्माण कम्पनीको काम प्रभावित भएको जनाइएको छ ।
निर्माण कम्पनी स्वच्छन्द–पप्पु–युनाइटेड बिल्डर्स संयुक्त उपक्रम का प्रतिनिधि प्रभु साहका अनुसार २०७५ असार ९ गते १७ वटा सडक निर्माणको जिम्मा लिइएको थियो । हालसम्म १२ वटा सडक मात्र निर्माण सम्पन्न भएको छ, जुन करिब ७५ प्रतिशत प्रगति हो ।
उनका अनुसार बाँकी सडक निर्माणमा विभिन्न अवरोधहरू छन् । कतिपय स्थानमा साइट क्लियर नभएको, घर–टहरा नहटाइएको, सडक क्षेत्रमा ५३६ वटा विद्युत् पोल रहेको तथा केही ठाउँमा स्थानीयले अदालतबाट अन्तरिम आदेश ल्याएका कारण काम अगाडि बढ्न नसकेको उनले बताए । यसबाहेक सार्वजनिक खरिद नियमावली, २०६४ अनुसार बिल पेश भएको ३० दिनभित्र भुक्तानी गर्नुपर्ने व्यवस्था भएपनि लामो समयदेखि रकम नपाउँदा निर्माण कार्य अवरुद्ध भएको कम्पनीको गुनासो छ ।
तीन वर्षभित्र सम्पन्न हुनुपर्ने योजना पाँच वर्ष बितिसक्दा पनि पूरा नहुँदा स्थानीयवासी र निर्माण कम्पनी दुवै असन्तुष्ट बनेका छन् । निर्माण कम्पनीले आवश्यक पूर्वतयारी, विशेषगरी साइट क्लियर नगरी काम अगाडि बढाउन सम्भव नभएको जनाउँदै सम्बन्धित निकायसँग समन्वय गरेर समस्या समाधान गर्न आग्रह गरेको छ ।
प्रतिक्रिया दिनुहोस् !