वीरगंज (पर्सा), ११ वैशाख । पर्सा जिल्लामा सडक विस्तारका क्रममा भत्काइएका घर–टहरामा व्यवसाय सञ्चालन नगर्न जिल्ला प्रशासन कार्यालयले कडा निर्देशन जारी गरेको छ । प्रशासनले जोखिमपूर्ण संरचनामा व्यापारिक गतिविधि जारी राख्दा मानवीय तथा भौतिक क्षतिको सम्भावना बढ्ने भन्दै यस्तो चेतावनी दिएको हो ।
सडक डिभिजन कार्यालय हेटौंडाको कार्यक्रमअन्तर्गत मितेरी पुलदेखि गण्डक चोकसम्मको क्षेत्रमा पर्ने घर–टहराहरू भत्काउने काम भइरहेको छ । अधिकांश घरधनीहरूले स्वस्फूर्त रूपमा संरचना हटाइसकेपनि केही स्थानमा भत्काइएका वा जोखिमयुक्त अवस्थामा रहेका घर–टहरामा अझै पनि व्यवसाय सञ्चालन भइरहेको पाइएको प्रशासनले जनाएको छ ।
यस्ता जोखिमयुक्त संरचनामा व्यापार–व्यवसाय सञ्चालन गर्दा कुनै पनि बेला दुर्घटना हुन सक्ने र त्यसबाट हुने क्षतिको जिम्मेवारी सम्बन्धित घरधनी स्वयंले वहन गर्नुपर्ने प्रशासनको स्पष्ट चेतावनी छ । साथै, प्रचलित कानुनअनुसार कारबाहीसमेत हुने उल्लेख गरिएको छ । जिल्ला प्रशासन कार्यालयले जोखिमयुक्त घर–टहरामा काम गर्ने मजदुर तथा सर्वसाधारणको सुरक्षालाई उच्च प्राथमिकतामा राख्न सबै सरोकारवालासँग आग्रह गरेको छ ।
जिल्ला विपद् व्यवस्थापन समितिको निर्णयअनुसार यस्तो सूचना जारी गरिएको प्रशासनले जनाएको छ । प्रशासनले सबैलाई सचेत रहन, जोखिमयुक्त संरचनामा कुनै पनि प्रकारको व्यापारिक गतिविधि नगर्न र सम्भावित दुर्घटना रोक्न सहयोग गर्न अनुरोध गरेको छ ।
प्रतिक्रिया दिनुहोस् !