वीरगंज (पर्सा), ९ वैशाख । मधेश प्रदेश प्रहरी संगठनभित्र पछिल्ला घटनाक्रमले नेतृत्वको प्रभावकारितामाथि गम्भीर प्रश्न उठाएको छ । प्रदेश प्रहरी कार्यालयमै घटेको एक संवेदनशील घटनाले आन्तरिक अवस्था कति जटिल बनेको छ भन्ने स्पष्ट पारेको छ ।
मधेश प्रदेश प्रहरी प्रमुख गोबिन्द थपलियाकै कार्यकक्षमा एक प्रहरी जवानले आत्महत्या प्रयास गर्नुले संगठनभित्रको मनोबल कति कमजोर अवस्थामा पुगेको छ भन्ने देखाएको छ । सुरक्षा स्रोतका अनुसार प्रहरी जवान रोशन यादवले आफ्नै हात काट्ने प्रयास गरेका थिए । घटनास्थलमै रहेका एक इन्स्पेक्टरको तत्परताले ठूलो दुर्घटना टरेको बताइएको छ ।
यस घटनाले मात्र होइन, पछिल्ला केही दिनयता सार्वजनिक भएका विवादहरूले पनि प्रहरी संगठनलाई थप संकटमा धकेलेका छन् । डीआईजी थपलियाको नाम जोडिएको कथित रकम असुली सम्बन्धी अडियो बाहिरिएपछि प्रहरीभित्रको वातावरण झन् तनावपूर्ण बनेको छ । उक्त प्रकरणले प्रदेश प्रहरी कार्यालय र धनुषा जिल्ला प्रहरीबीचको सम्बन्धमा समेत दरार ल्याएको बताइन्छ ।
प्रदेश कार्यालयबाट बढ्दो हस्तक्षेप र दबाबका कारण धनुषाका प्रहरी प्रमुख एसपी रुगम कुवर स्वास्थ्य समस्याका कारण अस्पताल भर्ना हुनुपरेको स्रोतको दाबी छ । यसले नेतृत्व तहबाट आवश्यक समन्वय र सन्तुलन कायम हुन नसकेको संकेत दिएको छ ।
यसबीच, तस्करसँग मिलेमतो गरी रकम असुली गरेको आरोपमा वरिष्ठ सई गोपाल थापा मगर र सई जयलाल यादवलाई प्रहरी प्रधान कार्यालय तानिएको छ । यी घटनाहरूले संगठनभित्र अनुशासन र नियन्त्रण कमजोर हुँदै गएको देखाउँछन् ।
त्यसैगरी, संगठनभित्रको अस्थिरता र दबाबको प्रभाव तल्लो तहसम्म पुगेको संकेत अन्य घटनाबाट पनि देखिएको छ । ड्युटी सकेर घर फर्किने क्रममा एक हलदार सवारी दुर्घटनामा परेर हाल उपचाररत रहेका छन् । समग्र घटनाक्रमलाई हेर्दा नेतृत्वसँग जोडिएको विवादित अडियो, कार्यकक्षमै भएको आत्महत्या प्रयास, र आर्थिक अनियमितताका आरोपहरूले मधेस प्रदेश प्रहरीको समग्र छविमाथि गम्भीर धक्का पुगेको छ ।
यदि यी विषयमा समयमै निष्पक्ष छानबिन, स्पष्ट कमाण्ड संरचना र आन्तरिक सुधारका ठोस कदम चालिएनन् भने संगठनभित्रको विश्वास संकट अझ गहिरिने जोखिम बढ्दै गएको देखिन्छ ।
प्रतिक्रिया दिनुहोस् !